Давлату Ҳукумати Тоҷикистон ва мардуми шарафманди он, дар симои хизматчиёни ҳарбии Қувваҳои Мусаллаҳ, ҳомиёни боэътимод ва муҳофизони далеру шуҷои марзу буми кишвари худро дида, баҳри поси хотираи афсарону сарбозони бонангу номуси Ватан, ки бо фидокориву ҷоннисорӣ, барои таҳкими истиқлоли миллӣ ва сулҳу суботи устувору сартосарӣ заминаи мустаҳкам фароҳам овардаанд, эҳтиром мегузоранд ва хизматҳои шоёни таҳсини онҳоро ҳамеша қадр менамоянд.
Ба муносибати таҷлил аз 28-умин солгарди Рўзи таъсисёбии Қувваҳои Мусаллаҳи Ҷумҳурии Тоҷикистон дар боғи Ғалабаи пойтахт бо мақсади гиромидошти хотираи неки афсарону сарбозон ва шаҳрвандоне, ки барои таъмини амният, сулҳу суботи ин марзу бум ва баҳри ҳаёти осоиштаи мардумони он ҷоннисорӣ кардаанд, аз номи Президенти Ҷумҳурии Тоҷикистон-Сарфармондеҳи Олии Қувваҳои Мусаллаҳ, муҳтарам Эмомалӣ Раҳмон, ҳайати роҳбарии Вазорати мудофиа ва собиқадорони Қувваҳои Мусаллаҳ дар назди лавҳа ва гулхани абадии хотиравӣ гулчамбарҳо гузоштанд. Дар чорабинии мазкур, вазири мудофиаи кишвар, муовинони ў, фармондеҳони навъҳои Қувваҳои Мусаллаҳ, сардорони раёсату шуъбаҳои Дастгоҳи марказиву Ситоди генералии ин ниҳоди қудратӣ ва дигар шахсони расмӣ ширкат намуданд.
Баъди анҷоми маросими гулгузорӣ, аз ҷониби ҳайати шахсии Ротаи қоравули фахрии Ситоди генералии Қувваҳои Мусаллаҳи мамлакат, гузашти низомӣ доир гардид.
Худи ҳамон рўз, инчунин ба муносибати таҷлил аз ҷашни муҳофизони Ватан, аз ҷониби масъулини Вазорати мудофиа дар назди лавҳаи ёдгории 28 нафар сарбози номаълум низ гулчамбар гузошта шуд.
Фаридун МАҲМАДАЛИЗОДА,
полковник
