Вазорати мудофиаи Ҷумҳурии Тоҷикистон тайи 6 соли охир бо таъсиси мактаби омодакунии прапоршикҳо беш аз ҳазор нафарро бо шаҳодатномаи тахассусӣ ва ҷойи кори доимӣ таъмин намудааст.
Марҳилаи 15-уми хатм дар
Мактаби омодакунии прапоршикҳои Вазорати мудофиа бо иштироки масъулини ин ниҳоди қудратӣ, меҳмонон ва дигар шахсони расмӣ бо тартиби муқаррарнамудаи ойинномаҳои умумиҳарбии Қувваҳои Мусаллаҳ сурат гирифт. Зимни баргузории чорабинӣ, нахуст аз ҷониби масъулини сохтори кадрӣ ва таълимоти ҳарбӣ фармоиши вазири мудофиаи мамлакат дар хусуси ба вазифаҳо таъйин гардидани ин гурӯҳи хатмкунандагон қироат карда шуд.
Дар ҷараён, хатмкунандагони 70 нафараи Мактаби прапоршикон бо даъвати афсарони масъул ба назди ҳайати роҳбариву фармондеҳӣ ҳозир гардида, бо ба ҷо овардани тартиботи ойинномавӣ, шаҳодатномаи хатм, рутбаи ҳарбии прапоршик ва роҳхат барои пешбурди фаъолият дар қисму воҳидҳои ҳарбии тобеи Вазорати мудофиа ва навъҳои қӯшуни Қувваҳои Мусаллаҳи Ҷумҳурии Тоҷикистонро қабул намуданд.
Ба ин муносибат, 
гурӯҳи прапоршикон ва ҳайати шахсии бо либоси идонаи низомӣ дар майдони чорабинӣ сафоростаро масъулини Вазорати мудофиа самимона табрик намуда, изҳор доштанд, ки бояд ҳар як хизматчии ҳарбӣ дар давоми фаъолияти хеш ба савганди ёднамудаааш содиқ монда, дар иҷрои вазифаҳои хизматӣ, ки он ҳифзи ҳар як ваҷаб хоки Ватани маҳбуб аст, масъулияти баланд зоҳир намояд. Ҳамчунин, қайд карда шуд, ки вобста ба иҷрои дасту супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти коҳиш додани сатҳи камбизоатӣ, ташкили ҷойҳои нави корӣ ва дар ин замина, фароҳам овардани зиндагии арзандаи сокинон имрӯзҳо роҳбарияти Вазорати мудофиаи кишвар низ тадбирҳои заруриро роҳандозӣ намуда, бо таъмини шаҳрвандон бо ҷойҳои корӣ дар беҳдошти вазъи иҷтимоии онҳо саҳми худро мегузоранд.
Ҳамин тавр, чанде аз хатмкунандагон низ зимни суханронии хеш, миннатдории ҷавонони он рӯз соҳиби рутбаи ҳарбигардида ва ба вазифаҳои низомӣ таъйиншударо ба роҳбарияти давлату Ҳукумат изҳор намуда, баён доштанд, ки ҷавобан ба ин ғамхориҳо содиқ монда, ба халқу Ватан мардонавор хизмат менамоянд.
Гузашти низомии афсарону сарбозон аз назди минбар анҷомбахши чорабинии навбатӣ дар ин мактаби ҳарбӣ гардид.
Аз ташкил ва оғози фаъолияти Мактаби омодакунии прапоршикони Қӯшунҳои хушкигарди Вазорати мудофиаи Ҷумҳурии Тоҷикистон, ки то имрӯз шаш сол сипарӣ гардида
аст, беш аз 1000 нафар бо шаҳодатномаи тахассусӣ ва ҷойи кори доимӣ таъмин гардидаанд. Дар воқеъ, амалинамоии ин ҳадаф, натанҳо талаботи ҷузъу томи Артиши миллиро бо кадрҳои прапоршикӣ қонеъ гардонид, балки он ба татбиқи барномаҳои давлатӣ дар самти зиёд намудани ҷойҳои кории холӣ ва таъмини шаҳрвандон бо ҷойи кору шароити муносиби хизматӣ низ мусоидат намудааст.
Бояд ёдовар шуд, ки тибқи тартиби мақарраргардида, ба курсҳои таълимии мактаби мазкур сарбозон, ки якуним сол хизмат намудаанд ва ё шаҳрвандоне, ки баъд аз анҷоми хизмати ҳарбӣ айни замон дар эҳтиёт қарор доранд, дар асоси шартномаҳои дуҷониба ҷалб ва ба омӯзиш фаро гирифта мешаванд.
Боқӣ Шарифзода,
рӯзноманигор
