Қувваҳои ҳарбӣ-ҳавоӣ ва мудофиаи зидиҳавоӣ яке аз бахшҳои муҳими Қувваҳои Мусаллаҳи Ҷумҳурии Тоҷикистон ба ҳисоб рафта, вазифаи асосии он муҳофизати фазои кишвар ва таъмини амнияти давлату миллат бо истифода аз чархболу ҳавопаймоҳои ҷангӣ ва воситаҳои муосири мудофиаи зиддиҳавоӣ мебошад.
Пас аз таъсиси Қувваҳои Мусаллаҳи Ҷумҳурии Тоҷикистон, зарурати таъсиси сохтори махсус барои ҳифзи фазои кишвар ба миён омад. Бо ин мақсад, Қувваҳои ҳарбӣ-ҳавоӣ ва мудофиаи зидиҳавоӣ соли 1993 ҳамчун ҷузъи таркибии Қувваҳои Мусаллаҳ ташкил ёфта, имрӯз ба яке аз пояҳои муҳими дифои миллӣ табдил ёфтааст.
Маврид ба зикри хос аст, ки ин навъи қӯшуни Қувваҳои мусаллаҳи мамлакат ба таркиби Системаи муттаҳидаи мудофиаи зиддиҳавоии Иттиҳоди Давлатҳои Мустақил шомил буда, дар баробари назорат, таъмини амнияти фазоии кишвар ва ҳифзи сарҳадоти заминии Тољикистони азиз, ҳамчунин сарҳадоти ҳавоии ҷануби Иттиҳоди Давлатҳои Мустақилро низ муҳофизат менамояд. Давоми 32 сол аст, ки Кувваҳои ҳарбӣ-ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон бо дастгирии ҳамаҷонибаи Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон бо дастовардҳои бузург дар самти мудофиаи давлат ва ҳифзи марзҳои ҳавоии кишвар ноил гардида, ҳайати шахсии он вазифаҳои муҳиму масъулиятноки низомии бар ӯҳдадоштаро муваффақона иҷро менамоянд.
Бахшида ба 32-солагии таъсисёбии Қувваҳои ҳарбӣ-ҳавоӣ ва мудофиаи зидиҳавоии Қувваҳои Мусалаҳи Ҷумҳурии Тоҷикистон дар Раёсати ин навъи қӯшуни Артиши миллӣ бо иштироки масъулини Ситоди генералии Қувваҳои Мусаллаҳ, роҳбарияти Мақомоти иҷроияи ҳокимияти давлатии ноҳияи Рудакӣ, афсарону сарбозон ва собиқадорони соҳа ҳамоиши тантанавӣ баргузор гардид.
Дар ҳамоиши мазкур баромадкунандагон қайд карданд, ки Қувваҳои ҳарбӣ-ҳавоӣ яке аз ҷузъҳои калидии қудрати дифоии давлат маҳсуб ёфта, таъмини амнияти фазоии кишвар, ҳифзи марзу буми ватан ва осоиши шаҳрвандонро таъмин менамояд. Дар тӯли даврони соҳибистиқлолӣ бо роҳбарии хирадмандонаи Асосгузори сулҳу ваҳдати миллӣ — Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон ин сохтори низомӣ рушду такомул ёфта, ба як қувваи боэътимоди муҳофизати давлат табдил ёфтааст.
Бояд гуфт, ки Қувваҳои ҳарбӣ-ҳавои ва мудофиаи зидиҳавоии Қувваҳои Мусаллаҳи Ҷумҳурии Тоҷикистон кафолати осоишу оромии мардуми Тоҷикистон буда, рамзи қудрат, истиқлол ва таъмини амният дар фазои мамлакат аст. Ин қувваҳо бо шарофати сиёсати сулҳпарваронаи Пешвои миллат, муҳтарам Эмомалӣ Раҳмон пайваста рушд карда, таҷҳизот ва нерӯи инсонӣ тадриҷан мукаммал мегардад.
Қайд гардид, ки рӯзи касбии ҳавонавардони низомии тоҷик барои афсарону сарбозон рамзи ифтихор аз Ватан, садоқат ба Парчами давлатӣ ва қувваи ягонаи миллӣ ба ҳисоб меравад. Дар воқеъ, таҷлили ин сана на танҳо ифтихори ҳарбӣ, балки рамзи сулҳу амнияти пойдори Тоҷикистони соҳибистиқлол аст.
Дар ҷамъомади тантанавӣ ба як қатор афсарону сарбозон медалу ифтихорнома ва тӯҳфаҳои хотиравӣ тақдим карда шуд.
