28 сол муқаддам бо ташаббуси бевоситаи Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ генерали артиш муҳтарам Эмомалӣ Раҳмон Бригадаи ҳамлаовари десантӣ – зарбавии Қӯшунҳои зудамали Қувваҳои Мусаллаҳи Ҷумҳурии Тоҷикистон таъсис дода шуд.
Ба муносибати таҷлили сазовор аз ин санаи муҳим дар пойгоҳи бригадаи мазкур чорабинии тантанавӣ баргузор карда шуд, ки дар он роҳбарияти Вазорати мудофиа, Мақомоти иҷроияи ҳокимияти давлатии ноҳияи Рӯдакӣ, ҳайати фармондеҳии ин навъи қӯшун, масъулин ва намояндагони сохторҳои низомӣ, собиқадорон, наздикону пайвандони сарбозон ва дигар меҳмонон иштирок намуданд.
Қабл аз оғози чорабинӣ аз ҷониби вазири мудофиаи Ҷумҳурии Тоҷикистон ва дигар иштирокчиён ҳамчун нишони эҳтиром ва пос доштани хотираи неки хизматчиёни ҳарбие, ки ҳангоми иҷрои вазифаҳои хизматӣ фавтидаанд, дар назди лавҳаи ёдгорӣ гулчанбар гузошта шуд.
Чорабинии тантанавӣ таҳти навои Сурудӣ миллӣ ва бо ворид намудани Парчами давлатӣ ва Байрақи ҷангӣ ба майдон оғоз гардид.
Вазири мудофиаи Ҷумҳурии Тоҷикистон, генерал-лейтенант Эмомалӣ Собирзода зимни суханронии худ оид ба таваҷҷуҳу ғамхориҳои пайвастаи Пешвои миллат, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон нисбат ба низомиён ибрози назар намуда, аз рӯзҳои таъсиси бригадаи десантӣ, дастоварду муваффақияти ҳайати шахсии он дар даврони соҳибистиқлолии мамлакат ёдовар шуд ва тамоми десантчиёни тоҷикро бо иди касбиашон табрик намуд.
Раиси ноҳияи Рӯдакӣ Абдуғаффор Ҳикматуллозода низ зимни баромади худ тамоми десантчиёни ғаюру диловари меҳанро бо иди касбияшон табрику муборакбод намуда, саҳми онҳоро дар сулҳу суботи мамлакат муҳим арзёбӣ намуд.
Чанд рӯз қабл яъне то баргузории ҷашн як зумра мусобиқаҳои гуногуни варзишӣ доир гардида буд, ки он дар ҷараёни чорабинӣ ҷамъбаст ва ғолибон бо Ҷом, диплом ва дигар туҳфаҳои хотиравӣ қадрдонӣ карда шуданд. Ҳамзамон як қатор афсарони Бригадаи ҳамлаовари десантӣ барои хизматҳои содиқонаву софдилона бо медалу ифтихорнома ҳавасманд гардонида шуданд.
Дар идома бахшида ба ҷашни десантчиёни меҳан чорабиниҳои гуногуни ҳарбӣ, намоиши силоҳу аслиҳаҳои замони муосир, техникаҳои низомӣ, ҷанги тан ба тан бо усули Шарқӣ ва дигар чорабиниҳои фарҳангиву фароғатӣ ташкилу баргузор карда шуд, ки он боиси ифтихор ва рӯҳбаландии ҳар як хизматчии ҳарбӣ гардид.
Бояд ёдовар шуд, ки Бригадаи ҳамлаовари десантии Қӯшунҳои зудамал, яке аз нерӯҳои эҳтиётии Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон ба ҳисоб рафта, он дар арсаи байналмилаливу минтақавӣ як қатор уҳдадориҳои муҳимро доро мебошад.
Аз ҷумла, се баталиони десантӣ аз ин навъи Қувваҳои Мусаллаҳ ба ҳайати нерӯҳои зудамали минтақаи Осиёи Марказӣ ва Бригадаи десантии он бошад, пурра ба ҳайати Қувваҳои муштараки вокуниши фаврии Созмони аҳдномаи амнияти дастаҷамъӣ шомиланд.
Дар давоми 28 соли мавҷудият, десантчиёни тоҷик дар ҳамоҳангӣ бо дигар воҳидҳои таъйиноти махсуси сохторҳои қудратӣ ва мақомоти ҳифзи ҳуқуқи мамлакат борҳо дар амалиёти мухталифи ҷангӣ иштироки фаъолона карда, вазифаҳои дар назди онҳо гузошташударо сарбаландона иҷро намудаанд.
Мавриди зикр аст, ки имрӯз дар ҳайати Бригадаи ҳамлаовари десантӣ, қисму воҳидҳои низомии Қӯшунҳои зудамали ҷумҳурӣ ва умуман дар сафи Артиши миллӣ хизматчиёни ҳарбии қавииродаву ватандӯст хизмат мекунанд, ки дар доираи дастуру супоришҳои Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ генерали артиш муҳтарам Эмомалӣ Раҳмон амал намуда, барои ҳифзи марзу бум ва ҳимояи ҳар зарра хоки поку муқаддасӣ ин сарзамини аҷдодӣ доимо омодаанд.
Маркази матбуот ва иттилооти
Вазорати мудофиаи Ҷумҳурии Тоҷикистон
