Маҷлиси мушовараи Вазорати мудофиаи Ҷумҳурии Тоҷикистон, ки бо иштироки котиби Шӯрои амнияти ҷумҳурӣ генерал–полковники адлия Раҳмон Юсуф Аҳмадзод, вазири мудофиаи мамлакат генерал–лейтенант Эмомалӣ Собирзода, роҳбарияти Сарпрокуратураи ҳарбӣ ва дигар сохторҳои марбутаи соҳавӣ доир гардид, бо натиҷагирии фаъолияти вазорати мудофиа дар давраи сипаригардида ва вазифагузориҳо барои нимсолаи дуюми соли 2025 оғоз ёфт.
Дар оғози ҷаласа вобаста ба иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ вазири мудофиа баромад намуда, бо назардошти вазъи имрӯзаи ҷаҳон ва таҳдиду хатарҳои замони муосир таъкид кард, ки хизматчиёни ҳарбиро зарур аст баҳри таъмини амнияти халқу давлат ва ҳифзи якпорчагии марзу буми кишвар дар ҳама ҳолат омодагии сатҳи баланд дошта бошанд.
Дар ҷаласа ҳамзамон як қатор масъалаҳои муҳими соҳавӣ, ки ба таъмини мудофиаи давлат ва таҳкими қудрати дифоии Артиши миллӣ нигаронида шудааст, мавриди баррасӣ қарор гирифт. Ҳайати роҳбарикунандаи ҷузъу томи Вазорати мудофиа ва навъҳои қӯшуни Қувваҳои Мусаллаҳи Ҷумҳурии Тоҷикистон дар рафти кори ҷаласа вазифадор гардиданд, ки дар фаъолияти худ ба сатҳи баланди омодабошии ҷангии ҳайати шахсӣ, омӯзиши ҳаматарафаи техникаву технологияи ҳозиразамони низомӣ, таъмини ҳолати равонӣ ва беҳдошти вазъи моддӣ–маишии ҳайати шахсӣ диққати аввалиндараҷа дода, бо ин роҳ дар татбиқи сиёсати ҳарбии давлату ҳукумати мамлакат саҳмгузор бошанд.
Котиби Шӯрои амнияти ҷумҳурӣ зимни баромади худ ин ҳама дастоварду музаффариятҳои артишро дар тӯли мавҷудият аз дастгириву таваҷҷуҳи ҳамешагии Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон нисбат ба хизматчиёни ҳарбӣ арзёбӣ намуда, зикр кард, ки низомиёни кишвар дар оянда низ бо чунин масъулияти баланд рисолати касбии худро дар назди давлат ва мардуми Тоҷикистон бо сари баланд иҷро намоянд.
Ҳамчунин, дар ҷаласа сардори Ситоди генералии Қувваҳои мусаллаҳи Ҷумҳурии Тоҷикистон ва дигар муовинони вазири мудофиа маърӯза намуданд. Баромадкунандагон дар рафти суханронии худ масъалаҳои мубраму муассири соҳавӣ, аз ҷумла дар сатҳи баланд нигоҳ доштани омодабошии ҷангӣ, санҷиши захираҳои сафарбарӣ, қувва ва воситаҳои мудофиаи ҳудудӣ, ташкили бомаром ва босифати чорабиниҳои даъвати шаҳрвандон ба хизмати ҳатмии ҳарбӣ, тарбияи мутахассисон, вазъи қонунияту тартиботи ҳуқуқӣ, интизоми ҳарбӣ, ҳолати таъминоту хизматрасонӣ дар самти ақибгоҳӣ ва дар ин замина омодагӣ ба зимистонгузаронӣ дар ҷузъу томи Вазорати мудофиа ва дигар навъҳои қӯшуни Артиши миллиро мавриди таҳлилу баррасӣ қарор доданд.
Вобаста ба масъалаҳои баррасигардида дар ҷаласаи навбатӣ, аз ҷумла татбиқи ҳамаҷонибаи Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” дар тарҳи нав, иҷрои саривақтии дастуру супоришҳои Пешвои миллат муҳтарам Эмомалӣ Раҳмон дар самти таҳкиму тақвият бахшидани иқтидори мудофиавии мамлакат ва ҳамзамон ҷиҳати омодагиҳо ба ҷашни 35-солагии Истиқлоли давлатии Ҷумҳурии Тоҷикистон иштирокчиёни ҷаласа аз ҷониби роҳбарияти Вазорати мудофиа бо дастуру супоришҳои мушаххас вазифадор гардиданд.
Маркази матбуот ва иттилооти
Вазорати мудофиаи Ҷумҳурии Тоҷикистон
