Тарбияи ҷисмонӣ ва рушду нумўи варзиш дар Қувваҳои Мусаллаҳ, баробари ташвиқу таблиѓи тарзи ҳаёти солим, инчунин ба сатҳи тайёрии ҷангии ҳайати шахсии ҷузъу томҳо таъсири мусбат расонида, омодагии хизматчиёни ҳарбиро дар самти иҷрои тамоми вазифаву уҳдадориҳои ҷангӣ боз ҳам афзун мегардонад. Чанде пеш вобаста ба ин масъала, дар “Кохи афсарон”-и Вазорати мудофиаи мамлакат маросими ҷоизасупорӣ ба беҳтарин варзишгарони ин ниҳоди қудратӣ баргузор гардид.
Маросими ҷоизасупорӣ ба беҳтарин варзишгарони низомӣ бо садои Суруди миллӣ ва бо иштироки ҳайати роҳбариву фармондеҳии Вазорати мудофиаи мамлакат дар фазои тантанавӣ баргузор гардид. Дар оѓози ин ҳамоиш, нахуст тавассути видеороликҳо доир ба дастоварду комёбиҳои Клуби марказии варзишии артиши Вазорати мудофиа сухан рафта, фаъолият ва бурду бохти он бисёр назаррас арзёбӣ карда шуд.
Роҳбарияти Вазорати мудофиа, зимни суханронии худ дар доираи ироаи Паёми навбатии Президенти Ҷумҳурии Тоҷикистон ба Маҷлиси Олии мамлакат иброз намуданд, ки Сарвари давлат ба масоили рушди соҳаи варзиш, оммавигардонии он, ташаккули тарзи ҳаёти солим, дарёфту дастгирӣ намудани истеъдодҳои ҷавон ва бунёди инфрасохтори замонавии муҷаҳҳаз бо лавозимоти зарурӣ барои ҷавонон диққати аввалиндараҷа равона менамоянд. Аз ин рў, қайд карда шуд, ки Вазорати мудофиаи мамлакат низ дар партави пешбурди сиёсати роҳбарияти давлату ҳукумати ҷумҳурӣ дар самти оммавигардонии варзиш тадбирҳои муҳимро амалӣ намуда, баҳри дастгирии ҳамаҷонибаи варзишгарон, рушду нумўи варзиш дар Қувваҳои Мусаллаҳ ва ташвиқу таблиѓи тарзи ҳаёти солим таваҷҷуҳи хосса зоҳир менамоянд.
Дар ҷараёни чорабинии мазкур, инчунин муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Дилшод Назаров низ оид ба дастовардҳои назарраси варзишгарони кишвар дар даврони соҳибистиқлолии мамлакат ибрози назар карда, изҳор дошт, ки варзишгарони Тоҷикистон зимни иштирок дар мусобиқаҳои байналмилалӣ дар 70 соли даврони Шўравӣ, агарчи соҳиби 133 медал гардида бошанд ҳам, лек дар 30 соли соҳибистиқлолии ҷумҳурӣ, ин нишондод ба 5 ҳазор медал расидааст.
Баъд аз суханрониҳо ва табрикоту таманниёт, маросими ҷоизасупорӣ ба беҳтарин варзишгарони Вазорати мудофиа ва ҳайати дастаҳои Клуби марказии варзиши артиши ин ниҳоди қудратӣ шуруъ гардид. Зимни ин маросим, аз ҷониби роҳбарияти Вазорати мудофиа, муовинони ў, намояндаи Кумитаи кор бо ҷавонон ва варзиш ва дигар ҳайати фармондеҳии Қувваҳои Мусаллаҳ ба беҳтарин варзишгарони Вазорати мудофиа ва дастаҳои Клуби зикргардида, ки дар соли 2020-ум бо иштироки фаъолонаи худ дар мусобиқаҳои дохилӣ ва берун аз кишвар ҷойҳои намоёнро ишѓол намуда буданд, бо ифтихорномаву сипосномаҳо, нишонаҳои сарисинагӣ, ҷому дигар туҳфаҳои хотиравӣ сарфароз гардонида шуданд.
Баро маълумот, хотиррасон мекунем, ки Клуби марказии варзиши артиш, як шохаи варзиши ҷумҳури буда, он аз соли 2003-юм инҷониб дар тобеияти Вазорати мудофиаи мамлакат амал менамояд. Ҳайати варзишгарони ин клуб, дар баробари рушду нумўи варзиш дар Қувваҳои Мусаллаҳ ва таблиѓи тарзи ҳаёти солим, инчунин дар самти тайёрии ҷангии ҳайати шахсии ҷузъу томҳо мусоидат менамоянд.
Боиси хушнудист, ки ҳайати дастаҳои Клуби марказии варзиши артиши Вазорати мудофиа аз замони ташкилёбӣ ва зимни иштироки фаъолонаи худ дар мусобиқаҳои сатҳи байналмилаливу дохилии кишвар 570 медали тилло, 371 медали нуқра, 407 медали биринҷӣ ва дар маҷумўъ, соҳиби 1348 ҷоизаи ифтихорӣ гардида, обрўю нуфузи Тоҷикистони азизро дар арсаи байналмилаливу минтақавӣ баланд бардоштаанд.
Дар фарҷоми маросими ҷоизасупорӣ ва баҳри рангину хотирмон баргузор намудани ин чорабинӣ, аз ҷониби ҳунармандони ансамбли “Шараф”-и Вазорати мудофиа барномаи хуби консертӣ намоиш дода шуд.
