Соли 2024 барои варзишгарони Вазорати мудофиа, хоса Клуби марказии варзиши артиш ба мисли солҳои қаблӣ соли бобарор ва пур аз дастоварду комёбиҳои арзандаи варзишӣ арзёбӣ мегардад. Зеро, варзишгарони артиш давоми соли сипаригардида дар 13-мусобиқаи шаҳрӣ, 35-мусобиқаи ҷумҳуриявӣ, 1-Ҷоми Осиё, 2-Чемпионати Ҷаҳон ва 4-мусобиқаи байналмилалӣ иштирок намуда, сазовори 62-медали тилло, 48-медали нуқра ва 57-медали биринҷӣ гардидаанд. Дар маҷмӯъ, шумораи умумии медалҳои ба даст овардаи варзишгарони Вазорати мудофиа дар соли 2024 ба 167 адад баробар мебошад, ки албатта, ин аз рушди бемайлони варзиш дар Қувваҳои Мусаллаҳ дарак медиҳад. Ин ҳама заҳмату талошҳо ва хизматҳо дар самти муаррифии давлату миллат мавриди таваҷҷӯҳ аст ва варзишгарон барои муваффақиятҳои арзанда қадрдонӣ карда мешаванд.
Ба ин муносибат дар “Кохи афсарон” бо иштироки масъулини Вазорати мудофиа, фармондеҳони навъҳои Қувваҳои Мусаллаҳ, мураббиёну варзишгарон, афсарони Дастгоҳи марказии вазорат ва Ситоди генералии Қувваҳои Мусаллаҳ, маросими ҷоизасупориву ҳавасмандгардонии варзишгарон дар соли 2024 баргузор гардид. Дар оғоз вобаста ба масъалаҳои дахлдор дар самти оммавигардонии варзиш, таблиѓи тарзи ҳаёти солим ва рушди бемайлони соҳа, ки он дар партави таваҷҷӯҳи доимии Президенти Ҷумҳурии Тоҷикистон муҳтарам Эмомалӣ Раҳмон қарор дорад, масъулини Вазорати мудофиаи мамлакат баромад намуда, бо изҳори хушнудӣ аз муваффақияту дастовардҳои арзандаи варзишгарони Вазорати мудофиа қайд карданд, ки Ҳукумати Тоҷикистон ҳанӯз аз оғози соҳибистиқлолии кишвар заминаҳои меъёриву ҳуқуқӣ ва ташкиливу инфрасохтории соҳаи варзишро фароҳам овардааст. Аз ҳамин ҷост, ки варзишгарони тоҷик пайваста дар мусобиқаҳои гуногуни варзишӣ иштирок намуда, дар арсаи байналмиллалӣ давлату миллати хешро муаррифӣ менамоянд. Албатта, ин шарафу ифтихори ҳар як фард пеш аз ҳама мо низомиёни мамлакат мебошад.
Тавре дар оғоз қайд гардид, ҳадаф аз ташкили маросими пуршукӯҳ ин ҷоизасупориву ҳавасмандгардонии варзишгарони Вазорати мудофиа ва дастаҳои варзишии қисму воҳидҳои низомӣ дар соли 2024 буд. Аз ин рӯ, дар қисмати асосӣ аз ҷониби масъулини Вазорати мудофиа ба варзишгарони муваффақ сипосномаву ифтихорномаҳо ва дигар туҳфаҳои хотиравӣ дар фазои тантанавӣ тақдим карда шуд.
Дар ин рӯз дастаҳои варзишии Бригадаи ҳамлаовари десантии Қӯшунҳои зудамали Қувваҳои Мусаллаҳи мамлакат, Донишкадаи ҳарбии Вазорати мудофиа ва Баталиони сулҷӯёнаи Тоҷикистон низ барои ноил гардидани ба натиҷаҳои хуби варзишӣ дар соли 2024 бо медалу ифтихорномаҳо ва ҷом сарфароз гардонида шуданд.
Фазои шодиву сурури варзишгарон ва кулли иштирокчиёни маросими навбатии ҷоизасупориро дар фарҷом суруду оҳангҳои ватанпарастонаи ҳунармандони ансамбли “Шараф”-и Вазорати мудофиа боз ҳам рангинтар гардонид.
Боқӣ ШАРИФӢ,
подполковник
