Варзиш дар ҳама давру замон, барои инсон аҳамияти муҳим дошта, яке аз омилҳои асосии тандурустӣ ва ташаккули шахсияти ҷисман ва рӯҳан солим ба шумор меравад.
Соли 2022 барои варзишгарони Клуби марказии варзишии Артиши Вазорати мудофиаи Ҷумҳурии Тоҷикистон соли бисёр бобарор ва хотирмон буд. Варзишгарони Артиш дар ин сол бо иштироки фаъоли худ дар 53 мусобиқаҳои ҷумҳуриявию байналмилалӣ, сазовори 141 медал гаштанд.
Бо ин мақсад, ҳафтаи равон дар «Кохи афсарон» маросими ҷоизасупорӣ ва ҳавасмандгардонии варзишгарони Вазорати мудофиаи Ҷумҳурии Тоҷикистон дар соли 2022 баргузор гардид, ки чорабинии мазкур бо садо додани Суруди миллӣ аз ҷониби ҳунармандони Оркестри ҳарбӣ-нафасӣ оғоз ёфт.
Масъулини Вазорати мудофиа зимни суханронии худ варзишгаронро барои ноил гардидан ба натиҷаҳои беҳтарин дар мусобиқаҳои шаҳрӣ, ҷумҳуриявӣ ва байналмилалӣ табрик намуда, қайд карданд, ки саҳми Клуби марказии варзишии Артиш дар баланд бардоштани маҳорати варзишии хизматчиёни ҳарбӣ, рушди камолоти шахсият, тарғиби тарзи ҳаёти солим, таҳким бахшидани дӯстию рафоқат, миёни ҷавонон бурдани ташвиқот бар зидди истеъмолу муомилоти ғайриқонунии маводи мухаддир, пешгирӣ намудани насли ҷавони кишвар аз гаравидан ба ҳар гуна ҳизбу ҳаракатҳои террористиву экстремистӣ хело ҳам назаррас аст.
Дар идомаи маросим афсарону сарбозон ва хизматчиёни давлатии Вазорати мудофиаи мамлакат барои дастовардҳои беҳтарини варзишӣ дар соли сипаригардида бо медалу сипоснома ва мукофоти пулӣ қадрдонӣ карда шуданд.
Воқеан, варзиш қисми муҳими фарҳанги умумибашарӣ ва қосиди сулҳу амонӣ буда, ба таҳкими саломатӣ ва инкишофи қобилияти ҷисмониву маънавии инсон, хусусан ҷавонон мусоидат мекунад. Варзиш на танҳо тарзи ҳаёти солим, балки масъулияти баланд ва дастоварди беназир барои ҳар фард, ҷомеа, миллат ва давлат буда, дар баробари дигар соҳаҳои ҳаёти мо он низ ҳамеша дар рушду такомул аст.
Дар фарҷом ҳунармандони ансамбли «Шараф»-и Вазорати мудофиа бо барномаи консертии худ, ки фарогири сурудҳои дилнишину ватандӯстона буд, табъи ҳозирин ва варзишгаронро болида сохтанд.
Шоҳин ШАРИФОВ
