Аз 12-уми июни соли 2023, 1500 нафар шаҳрвандоне, ки ихтиёран ва бо пардохти маблағи муайян дар ҳайати захираҳои даъвати сафарбарӣ ҷалб гардида буданд, дар 2 баст ва дар машқгоҳу марказҳои таълимии “Фахробод”-и вилояти Хатлон, “Тоҷмаҳал” ва “Лоҳур”-и гарнизони Душанбе ва дар пойгоҳи филиали Донишкадаи ҳарбии Вазорати мудофиа дар вилояти Суғд ӯҳдадорӣ ё худ хизмати ҳарбиро бо гузаштани ҷамъомади якмоҳаи ҳарбӣ, ҳамчун сарбоз адо менамоянд.
Барномаҳои таълимии якмоҳаи сарбозон дар ҳайати захираҳои даъвати сафарбарӣ, бо усули минтақавӣ ва тибқи Низомномаи тартиби адои хизмати ҳарбӣ, талаботи оинномаҳои ҳарбӣ ва амру фармоишҳои вазири мудофиа, ки барои хизматчиёни ҳарбии хизмати мӯҳлатнокро адокунанда муқаррар карда шудаанд, ҷараён дорад.
Дар ҳамаи машқгоҳу марказҳои таълимӣ барои хизмати ҳамарӯза, нигаҳдории онҳо ва ташкилу баргузор намудани дарсу машғулиятҳои назариявӣ ва ҳам амалии саҳроӣ, тамоми шароити лозима муҳайё гардида, барномаҳои таълимии сарбозон, мутобиқ ба 30 рӯзи хизмат дар ҳайати захираҳои даъвати сафарбарӣ таҳия, тасдиқ ва амалан татбиқ карда шуда истодаанд.
Барои маълумот хотиррасон менамоем, ки тибқи талаботи моддаи 37-и Қонуни Ҷумҳурии Тоҷикистон “Дар бораи ӯҳдадории ҳарбӣ ва хизмати ҳарбӣ” шаҳрвандони ҷинси марди аз 18 то 27 сола, ки ҳуқуқи озод шудан ва ё ба таъхир гузоштани муҳлати даъват ба хизмати ҳарбиро надоранд, метавонанд ба комиссариатҳои ҳарбии маҳалли зисташон бо ариза муроҷиат намуда, бо тартиби муайян, ба таври ихтиёрӣ ва бо супоридани маблағ ба суратҳисоби махсуси Вазорати мудофиа, хизмати ҳарбиро дар ҳайати захираҳои даъвати сафарбарӣ адо намоянд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
