Бо мақсади баланд бардоштани сатҳи омодагии ҷангӣ, такмили донишу маҳорати касбии ҳайати роҳбариву фармондеҳӣ, омӯзиши таҷрибаи пешқадам ва ҷорӣ намудани усулҳои нави омодасозии хизматчиёни ҳарбӣ мутобиқ ба талаботи ҷангҳои муосир, рӯзҳои 6 ва 7-уми июли соли ҷорӣ бо иштироки ҳайати роҳбарикунандаи Вазорати мудофиаи кишвар ҷамъомади таълимӣ-методӣ баргузор гардид.
Рӯзи аввали ҷамъомад бо ҷамъшавӣ, сафороӣ ва азназаргузаронии ҳайати шахсии иштирокчиён оғоз гардид. Пас аз санҷиши омодагии ҳайати роҳбарикунанда, дар толори асосии Вазорати мудофиа машғулияти назариявӣ дар мавзуи «Вазъияти ҳарбӣ-сиёсии минтақа ва ҷаҳон» баргузор карда шуд.
Дар рафти машғулият вазъи кунунии амниятӣ, таҳдиду хатарҳои муосир, хусусиятҳои низоъҳои минтақавӣ ва ҷаҳонӣ, инчунин вазифаҳои асосии Қувваҳои Мусаллаҳ мавриди таҳлил қарор гирифтанд.
Рӯзи дуюм аз субҳи барвақт ҳайати роҳбарикунанда ба машқгоҳи «Ҳарбмайдон»-и гарнизони Хатлон сафарбар гардиданд. Дар ин машқгоҳ машғулиятҳои амалии гуногун доир гардида, иштирокчиён бо шаклу усулҳои нави идоракунии амалиёти ҷангӣ, истифодаи технологияҳои муосир ва таҷрибаи пешқадам аз наздик шинос шуданд.
Вазири мудофиаи Ҷумҳурии Тоҷикистон генерал-полковник Эмомалӣ Собирзода зимни суҳбат бо ҳайати иштирокчиён қайд намуд, ки машғулиятҳоро боддиқат ва масъулияти баланд аз худ намуда, аз онҳо дар раванди фаъолияти корӣ самаранок истифода намоянд.
Таваҷҷуҳи ҳайати шахсӣ ба машғулиятҳои муҳими намоишӣ аз ҷумла, нуқтаи такягоҳи взвод, гузаронидани амалҳои тактикӣ ва истифодаи дастгоҳҳои парвозкунандаи бесарнишини навъи дрон љалб карда шуд. Дар ҷараёни машғулият тартиби муайянсозии мавқеи душманони шартӣ ва самаранок истифода намудани дастгоҳу воситаҳои ҳозиразамони ҷангӣ амалан нишон дода шуд.
Дар фарҷоми ҷамъомади таълимӣ-методӣ ва зимни натиҷагирии машғулиятҳо муовинони вазири мудофиа вобаста ба самтҳои фаъолияташон баромад намуда, сатҳи омодагии ҳайати роҳбарӣ, рафти иҷрои машғулиятҳо, камбудию дастовардҳо ва роҳҳои такмили минбаъдаи фаъолиятро мавриди таҳлили ҳамаҷониба қарор доданд.
