Дар Полки таъминотӣ ва идоракунии Ситоди генералии Қувваҳои Мусаллаҳи Ҷумҳурии Тоҷикистон бо иштироки вазири мудофиа, генерал — полковник Собирзода Эмомалӣ, муовинони вазир, сардорони раёсату шуъбаҳои дахлдори вазорат, комиссарони ҳарбии вилоятҳо ва шаҳру ноҳияҳо, инчунин сардорони зершуъбаҳои даъват ва тайёрии ҷавонон ба хизмати ҳарбӣ ҷамъомади таълимию методӣ баргузор шуд.
Дар ҷараёни ҷамъомад масъалаҳои муҳими вобаста ба омодагӣ ва ташкили даъвати навбатии шаҳрвандон ба хизмати ҳарбӣ мавриди таҳлилу баррасии ҳамаҷониба қарор гирифт.
Аз ҷумла, Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1999-2008 – и Ҷумҳурии Тоҷикистон ба хизмати ҳарбӣ» шарҳу тавзеҳ ёфта, тартиби иҷрои он ба масъулини сохторҳои дахлдор фаҳмонда шуд.
Гуфта шуд, ки дар замони соҳибистиқлолии кишвар ҳар як афсар ва сарбози Ватан таҳти таваҷҷӯҳ ва ғамхории доимии Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳи мамлакат, Генерали Артиш муҳтарам Эмомалӣ Раҳмон қарор доранд ва маҳз ин таваҷҷӯҳу дастгириҳо боис гардидааст, ки имрӯз дар тамоми қисму воҳидҳои низомии сохторҳти қудратӣ шароити беҳтарини кору хизмат фароҳам мебошад.
Дар ин замина ҳамзамон шумораи ихтиёриён ба сафи Артиши миллӣ бештар гардида, ҷавонон бо як ҳисси баланди ватандӯстӣ, меҳанпарастӣ ва ҳувияти миллӣ баҳри ҳимояи марзу буми Ватани хеш, савганди ҳарбӣ ёд мекунанд.
Ҷиҳати ҷалби бештари ҷавонон ба хизмати ҳарбӣ, аз масъулин талаб карда шуд, ки ҳамкориро бо аҳолӣ дар сатҳи баланд ба роҳ монда, баргузории вохуриву чорабиниҳои гуногуни ҳарбӣ – сиёсӣ, варзишӣ, фарҳангиву фароғатӣ ва дигар корҳои фаҳмонидадиҳиро тақвият бахшанд.
Бо боварӣ иброз гардид, ки нақшаи даъвати баҳории шаҳрвандон ба хизмати ҳарбӣ дар муҳлати муайян иҷро гардида, сафарбар намудани ҷавонон ба сафи Артиши миллӣ дар ҳама шаҳру ноҳияҳои кишвар дар сатҳи баланд сурат мегирад.
