Ҷамъомади таълимии мудофиаи ҳудудӣ дар шаҳри Панҷакент ҳамчун рамзи ифтихор ва сарбаландиву сарфарозӣ аз давлати соҳибистиқлоли Тоҷикистон бо садо додани Суруди миллӣ аз ҷониби иштирокчиён ва ҳайати шахсии шаҳрвандони дар эҳтиётқарордошта оғоз гардид.
Майдони фурудгоҳи шаҳр дар баробари ҳузури зиёди сокинон, инчунин бо парчамҳои давлатӣ ва шиору овезаҳо оро дода шуда, мавзеи баргузории ҷамъомадро фазои идона фарогир буд.
Масъулини Ситоди генералии ҚМ ҶТ, роҳбарияти шаҳр ва мақомотҳои дахлдор дар нуқтаи ҷамъшавӣ бо шаҳрвандон аз наздик сӯҳбат намуда, дар баробарӣ баҳогузорӣ ба ҳолати омодагии сокинон ба иҷрои ӯҳдадориҳои шаҳрвандӣ, инчунин сатҳи тайёрии қувваю воситаҳо ва техникаҳои хоҷагии халқро низ санҷиш намуданд. Барои омодагии сатҳи баланд, нишон додани масъулияти фарзандӣ дар назди Модар-Ватан, арҷгузорӣ ба хизматҳои шабонарӯзии Пешвои миллат муҳтарам Эмомалӣ Раҳмон дар роҳи бунёди давлати соҳибистиқлоли тоҷикон ва рушду инкишофи ҳамаҷонибаи он, ба ҳар як иштирокчӣ сипосу миннатдорӣ баён карда шуд
Сардори Ситоди генералии Қувваҳои Мусаллаҳ-муовини якуми вазири мудофиаи Ҷумҳурии Тоҷикистон, генерал-лейтенант Бобоҷон Саидзода ва роҳбарияти шаҳри Панҷакент баъди боздид аз сафороии даъватшудагон, дар назди ҳозирин сухан гуфта, зимни шарҳи моҳияту аҳамияти бо қатъномаи Маҷмааи Умумии Созмони Милали Муттаҳид қабул шудани ташаббуси Ҷумҳурии Тоҷикистон «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036» таваҷҷӯҳи онҳоро ба вазъи мураккаби сиёсии минтақа ва ҷаҳон, зарурати боз ҳам баланд бардоштани иқтидори мудофиавии мамлакат, таъмини ягонагии ҳудудиву марзии кишвар, осоишу амнияти аҳолӣ, пешгирии амалҳои душманонаи созмонҳои террористию экстремистӣ, гароиши ҷавонон ба ақидаҳои ифротӣ, ичунин боз ҳам боло бурдани обрӯю эътибори Тоҷикистони азизамон дар арсаи байналмилалӣ ҷалб намуданд.
Сокинон низ омодагии худро барои ҳимоя аз Ватан ва ҳифзи дастоварҳои беназири даврони 35- соли соҳибистиқлоли кишвари азизамон иброз доштанд. Дар идомаи ҷамъомад барои чунин омодагӣ ва шукргузориҳои пайваста чанде аз иштирокчиёни фаъол ва падару модарони сарбозон бо сипосномаҳои Вазорати мудофиа ва мақомоти иҷроияи Ҳокимияти маҳалли шаҳри Панҷакент қадрдонӣ карда шуданд.
Ситоди мудофиаи ҳудудии шаҳр бо таҳлилу натиҷагирии ҷамъомади мазкур идома ёфта, зимнан масъалаҳои марбут ба даъвати тирамоҳии шаҳрвандон ба хизмати ҳарбӣ дар шаҳри Панҷакент баррасӣ карда шуд.
