Сокинони ноҳияи Кӯҳистони Мастчоҳ бо ҳисси баланди масъулияти шаҳрвандӣ ва рӯҳияи ватандӯстӣ дар чорабиниҳои санҷишии мудофиаи ҳудудии ноҳия фаъолона иштирок намуданд. Аз субҳи барвақт сокинон аз дурдасттарин ҷамоату деҳаҳои ноҳия тавассути техникаҳои хоҷагии халқ, ки бо Парчами давлатии Ҷумҳурии Тоҷикистон ва шиору овезаҳои ватандӯстона оро дода шуда буданд, ба макони баргузории чорабинӣ ҳозир гардиданд.
Иштирокчиён бо эҳсоси ифтихор аз Ватан ва арҷгузорӣ ба арзишҳои миллӣ дар ҷамъомад ширкат варзида, омодагии худро баҳри иҷрои вазифаҳои шаҳрвандӣ изҳор намуданд. Зимни вохӯрӣ ва сӯҳбати самимӣ бо иштирокчиён масъулин Вазорати мудофиа якдилона ширкат намудан дар ин ҷамъомади таълимиро нишонаи олии дӯст доштани Ватан ва эҳтирому арҷгузорӣ ба хизматҳои Пешвои муаззами миллат муҳтарам Эмомалӣ Рамон арзёбӣ карданд.
Дар ҷараёни чорабинӣ муовини вазири мудофиа, генерал — майор Раҳимзода Музаффар ва роҳбарияти ноҳия оид ба аҳамияти мудофиаи ҳудудӣ, баланд бардоштани масъулияти шаҳрвандон ва таҳкими иқтидори мудофиавии мамлакат суханронӣ карданд. Зикр гардид, ки муттаҳидӣ, ватандӯстӣ ва ҳисси баланди масъулияти ҳар як сокини кишвар омили муҳими ҳифзи сулҳу оромӣ ва рушди устувори давлат мебошад.
Ҳамзамон, сокинони сарбаланди ноҳияи Кӯҳистон Масчоҳ низ эҳтиром ва пуштибонии худро аз сиёсати созандаву бунёдкоронаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, иброз дошта, омодагии худро барои саҳмгузорӣ дар ҳифзи дастовардҳои истиқлолият ва таъмини амнияти кишвар таъкид намуданд.
Дар анҷоми ҷамъомад ба волидайни сарбозон, иштирокчиёни фаъол ва шахсоне, ки дар омодагӣ ва баргузории чорабинӣ саҳми арзанда гузоштанд, сипоснома ва туҳфаҳои хотиравӣ тақдим гардида, саҳми онҳо баланд арзёбӣ карда шуд.
