Ҷамъомади тантанавӣ ба муносибати таҷлил аз 26-умин солагарди Рӯзи Ваҳдати миллӣ дар Вазорати мудофиаи мамлакат бо дароварадани Парчами давлатӣ, Байрақи ҷангӣ ба толор ва бо садо додани Суруди миллӣ оғоз гардид.
Зимни баргузории ҷамъомад масъулини Ситоди генералии Қувваҳои Мусаллаҳ ва раиси Кумитаи иҷроияи Ҳаракати Ваҳдати миллӣ ва эҳёи Тоҷикистон дар назди ҳайати роҳбариву фармондеҳӣ ва хизматчиёни ҳарбии Дастгоҳи марказии вазорат ва Ситоди генералии Қувваҳои Мусаллаҳ вобаста ба нақш ва моҳияти Созишномаи умумии истиқрори сулҳ ва ризояти миллӣ суханронӣ намуда, ҷанбаъ ва омилҳои гуногуни таҳкими Ваҳдати миллиро мавриди муҳокима қарор доданд.
Зимнан таъкид карда шуд, ки Ваҳдати миллӣ дастоварди беназирест, ки дар натиҷаи дарки дурусти хатари азбайнравии Истиқлоли давлатӣ ва дар мадди аввал гузоштани манфиатҳои умумимилливу субботу оромии ҷомеа ба имзо расидааст.
Албата, дар ин ҷода саҳми Президенти кишвар, мӯҳтарам Эмомалӣ Раҳмон бузург аст, ки зина ба зина дар кишвар субботу оромӣ пойдор гардида, раванди бозсозии иқтисоди кишвар, рушти демократия, гуногунандешӣ, ташаккули афкори созандаву худшиносии миллӣ равнақу ривоҷи тоза касб намуда, пояҳои Ваҳдати миллӣ мустаҳкам гардид.
Ҳамзамон дар идомаи ин ҷамъомад, Артиши миллӣ низ яке аз омилҳои таҳкимбахш ва поягузори Ваҳдати миллӣ дар кишвар арзёбӣ гардида, баҳри барқарор кардани сохти конститутсионӣ ва фароҳам сохтани фазои орому осуда садҳо ҷавонмардони бонанги Ватан дар сангарҳо ҷон бохта, барои мо сулҳу вахдати сартосариро фароҳам сохтанд.
Дар воқеъ, аҳамияти муҳиму сарнавиштсози ин санаи таърихӣ мебошад, ки ҳамасола Рӯзи Ваҳдат ҳамчун ҷашни умумиллӣ дар саросари кишвар, аз ҷумла дар Қувваҳои Мусаллаҳ бо шукӯҳу шаҳомати хоса таҷлил карда мешавад. Низомиёни мамлакат низ дар рӯзҳои таҷлил аз ин ҷашнвораи таърихӣ дар пойгоҳи тамоми қисму воҳидҳои низомӣ ҷамъомадаҳои тантнавӣ, конференсияҳои илмӣ-амалӣ, мусобиқаҳои гуногуни варзишӣ ва чорабиниҳои фарҳангиву фароғатиро бо оростани дастархони идона доир менамоянд.
ТАҶЛИЛИ ҶАШНИ ВАҲДАТИ МИЛЛӢ ДАР АГЕНТИИ ТАЪМИНОТИ АМВОЛИ МАХСУС
Чунин як ҷамъомади тантанавӣ дар Агентии таъминоти амволи махсуси назди Ҳукумати Ҷумҳурии Тоҷикистон низ бо иштироки роҳбарият ва ҳайати шахсии он доир гардид. Масъулини агентӣ зимни баромади худ вобаста ба нақш ва ҷойгоҳи Ваҳдати миллӣ дар ҳаётии сиёсии ҷомеа ва таҳкими рукнҳои муҳими давлатӣ андешаронӣ намуда, зикр карданд, ки маҳз ваҳдату ҳамдилии мардуми шарафманди диёр буд, ки имрӯз таҳти роҳбарии Пешвои миллат, мӯҳтарам Эмомалӣ Раҳмон дар роҳи рушд ва фардои дурахшони Ватан гомҳои устувор гузошта, даст ба дасти ҳам барои рушду инкишофи Тоҷикистони азиз ҷаҳду талош менамоем ва ба шарофати ваҳдату соҳибистиқлолӣ имрӯз ба дастоварду музаффариятҳои беназир ноил гардидем.
Боқӣ ШАРИФОВ
