Ҷамъомади тантанавӣ, ба муносибати таҷлил аз 25-умин солагарди Рӯзи Ваҳдати миллӣ дар Вазорати мудофиаи мамлакат бо дароварадани Парчами давлатӣ, Байрақи ҷангӣ ба толор ва бо садо доани Суруди миллӣ оғоз гардид.
Зимни баргузории ҷамъомад намояндагони сохторҳои гуногуни давлативу қудратӣ дар назди ҳайати роҳбариву фармондеҳӣ ва хизматчиёни ҳарбии Дастгорҳи марказии вазорат ва Ситоди генералии Қувваҳои Мусаллаҳ вобаста ба нақш ва моҳияти Созишномаи умумии истиқрори сулҳ ва ризояти миллӣ суханронӣ намуда, ҷанбаъ ва омилҳои гуногуни таҳкими Ваҳдати миллиро мавриди муҳокима қарор доданд.
Зимнан таъкид карда шуд, ки Ваҳдати миллӣ дастоварди беназирест, ки дар натиҷаи дарки дурусти хатари азбайнравии Истиқлоли давлатӣ ва дар мадди аввал гузоштани манфиатҳои умумимилливу субботу оромии ҷомеа аз ҷониби тарафҳои сулҳхоҳ ба имзо расидааст.
Бояд гуфт, ки Ваҳдати миллӣ дар шароите ба даст омад, ки на ҳамаи гурӯҳҳо аз тасвиби он истиқбол мекарданд. Албатта, дар ин ҷода саҳми Президенти кишвар, муҳтарам Эмомалӣ Раҳмон бузург аст, ки зина ба зина дар кишвар субботу оромӣ пойдор гардида, раванди бозсозии иқтисоди кишвар, рушти демократия, гуногунандешӣ, ташаккули афкори созандаву худшиносии миллӣ равнақу ривоҷи тоза касб намуда, пояҳои Ваҳдати миллӣ мустаҳкам гардид.
Дар воқеъ, аҳамияти муҳиму сарнавиштсози ин санаи таърихӣ мебошад, ки ҳамасола Рӯзи Ваҳдат ҳамчун ҷашни умумиллӣ дар саросари кишвар, аз ҷумла дар Қувваҳои Мусаллаҳ бо шукӯҳу шаҳомати хоса таҷлил карда мешавад. Низомиёни мамлакат низ дар рӯзҳои таҷлил аз ин ҷашнвораи таърихӣ дар пойгоҳи тамоми қисму воҳидҳои низомӣ ҷамъомадҳои тантанавӣ, конфренсияҳои илмӣ-амалӣ, мусобиқаҳои гуногуни варзишӣ ва чорабиниҳои фарҳангиву фароғатиро бо оростани дастархони идона доир менамоянд.
Боқӣ ШАРИФОВ
