Дар доираи ҷараёни даври якуми омӯзиш дар Қувваҳои Мусаллаҳи Ҷумҳурии Тоҷикистон бо ҷалби ҳайати афсарони ҷузъу томи муҳандисии қисмҳои ҳарбии Вазорати мудофиа ва навъҳои қӯшуни Қувваҳои Мусаллаҳи малакат дар пойгоҳи Маркази таълимии минтақавӣ оид ба хавфҳои воситаҳои хатарноки тарканда ва машқгоҳи низомии Лоҳур ҷамъомади методӣ-таълимӣ доир гардид, ки ширкаткунандагон дар рафти он роҳу воситаҳои нави фаъолияти касбиашонро мавриди таҳлилу омӯзиш қарор доданд.
Дар қисмати аввали ҷамъомад, ки он ба таври назариявӣ ҷараён гирифт, масъулини Раёсати Қӯшунҳои муҳандисии Ситоди генералии Қувваҳои Мусаллаҳи Ҷумҳурии Тоҷикистон дар мавзӯъҳои гуногуни соҳавӣ, аз ҷумла, тартиби таҷҳизонидани истеҳкомҳои мудофиавӣ дар маҳалли ҷанг, тавсифи тактикӣ-техникӣ, тарзи васлкунӣ ва кори борутҳои хандақӣ ва вобаста ба сохту таркиб ва қисмҳои асосии техникаҳои махсуси муҳандисӣ маърӯзаҳо пешниҳод намуданд. Баромадкунандагон бо дарназардошти хизмати масъулиятнок дар сафи ҷузъу томи Қӯшунҳои муҳандисӣ таъкид карданд, ки пешбурди фаъолияти муҳандисӣ-минаҷӯйӣ аз ҳар як афсари соҳа маҳорати баланди касбӣ ва омӯзиши техникаву таҷҳизоти ҳозиразамони соҳавиро тақозо менамояд.
Аз ин рӯ, дар қисмати амалии ҷамъомад ё худ зимни гузаронидани машѓулиятҳои ронандагӣ бо навъҳои гуногуни техникаҳои муҳандисӣ, нахуст аз ҷониби роҳбарони машѓулиятҳо ба афсарони ширкатдошта хислатҳои тактикиву техникии автомобилҳои маҳандисиву минаҷӯйӣ, иқтидору тавонмандӣ ва талаботи бехатарии истифодаву нигоҳдории онҳо фаҳмонида шуд.
Ҳамзамон, дар рафти ҷамъомади таълимии навбатӣ, ҳайати шахсӣ воситаҳои гуногуни фаъолияти муҳандисӣ, аз қабили ҳамвору барқарор намудани роҳҳо, сохтани гузаргоҳҳо 
барои техникаҳои низомӣ дар минтаҳои душворгузар, ошкору безарар ва нобуд сохтани минаҳои тарканда, разветкаи муҳандисӣ, корҳои таркишиву безараргардонӣ ва дигар амалҳоро вобаста ба самти фаъолияти хизматӣ мавриди омӯзиш қарор доданд. Зимнан, ба афсарони соҳа таъкид карда шуд, ки дар фаъолияти касбии хеш, ки асосан корҳои таркишиву безараргардонии минаҳо мебошад, масъулиятшинос бошанду ҷиҳати таълими дарусти сарбозон доир ба минаҷӯйӣ ва дарёфту безараргардонии он, аз роҳу воситаҳои ҳозирамон кор гиранд.
Боқӣ ШАРИФОВ,
майор
