Дар доираи нақшаи чорабиниҳои Вазорати мудофиаи мамлакат ва ҷиҳати иҷрои дастуру супоришҳои Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали арииш, муҳтарам Эмомалӣ Раҳмон дар шаҳри Кӯлоб бо иштироки роҳбарияти Вазорати мудофиаи кишвар ҷамъомади санҷишӣ оид ба мудофиаи ҳудудӣ ва сатҳи тайёрии шаҳрвандон ба иҷрои вазифаҳои муҳими шаҳрвандӣ баргузор гардид.
Дар чорабинии мазкур шаҳрвандони дар эҳтиётқарордошта, намояндагони мақомоти давлатӣ, сохторҳои қудратӣ ва теъдоди зиёди техникаҳои хоҷагии халқ, ки қувва ва воситаҳои мудофиаи ҳудудӣ ва захираҳои сафарбариро ташкил медиҳанд, иштирок намуданд.
Зимни баргузории ҷамъомад Вазири мудофиаи Ҷумҳурии Тоҷикистон генерал-полковник Собирзода Эмомалӣ ва масъулини мақомоти иҷроияи Ҳокимияти давлатии шаҳри Кӯлоб ҳолати омодабошии ҳайати иштирокдорони ин чорабинии муҳими сиёсӣ ва техникаҳои ҷалбгардидаи хоҷагии халқро мавриди санҷиш қарор дода, бо ҳайати шахсии шаҳрвандони дар эҳтиётқарордошта аз наздик сӯҳбат намуданд.
Таъкид гардид, ки таҳкими нерӯ ва иқтидору тавоноии Артиши милии мамлакат, омодабошии захираҳои сафарбарӣ, инчунин такмили донишу маҳорати мудофиавии ҳар як шаҳрванд ва ҷавонони қобил ба хизмати ҳарбӣ ҳамеша дар меҳвари таваҷҷуҳи Роҳбарияти Олии давлат қарор дошта, баргузории чунин чорабиниҳо дар баланд бардоштани сатҳи омодагӣ, ҳамкории сохторҳои масъул ва пеш аз ҳама дар ҳифзи амнияту суботи кишвар аҳамияти муҳим дорад.
Дар идома зикр карда шуд, ки шаҳри Кӯлоб бо сокинони сарбаланду меҳнатқарини хеш дар рушди соҳаҳои саноат ва кишоварзӣ нақши назаррас дошта, сокинони он дар баробари саҳмгузорӣ дар пешрафти иқтисоди миллӣ, ҳамчунин барои ҳимоя аз дастовардҳои Истиқлоли давлатӣ ва таҳкими Ваҳдати миллӣ низ ҳамеша омода мебошанд. Ҳамзамон, зимни иштироки фаъолона дар чорабинии мазкур сокинон бо рӯҳияи баланди ватандӯстона иброз доштанд, ки барои ҳимоя аз Ватан ва ҳифзи дастовардҳои муҳиму арзандаи даврони 35 соли Истиқлоли давлатӣ, ҳамчун фарзандони содиқу сарсупурда ба халқ ва сарзамини биҳиштманзар хизмат менамоянд.
Дар анҷоми ҷамъомад як қатор фаъолон ва волидони сарбозони қисму воҳидҳои ҳарбии Қувваҳои Мусаллаҳи Ҷумҳурии Тоҷикистон аз шаҳри Кӯлоб барои саҳмгузорӣ дар тарбияи ватандӯстии ҷавонон ва дастгирии сиёсати мудофиавии давлат бо Сипосномаи Вазорати мудофиаи Ҷумҳурии Тоҷикистон ва рутбаҳои навбатии ҳарбӣ қадрдонӣ шуданд.
