Афсарони сохтори идораи Вазорати мудофиа, ҷузъу томи зертобеи он ва навъҳои қӯшуни Қувваҳои Мусаллаҳи мамлакат зимни ҷамъбасти ҳар як давраи омӯзишӣ ба ҷамъомаду машғулиятҳои методӣ-таълимӣ ҷалб карда мешаванд. Чунин як ҷамъомад бо иштироки сардорони ситоду муовинони онҳо, афсарон оид ба сафарбарии ҷузъу том, намояндагони хадамоти қӯшун ва бехатарии хизмати ҳарбии қисму воҳидҳои низоми Вазорати мудофиа дар пойгоҳи Донишкадаи ҳарбӣ доир гардид.
Асосан зимни иштирок дар ин гуна ҷамъомадҳо афсарони соҳа вобаста ба таҳаввулоти босуръати илму технология дар замони муосир, тағиротҳои нави воридкардашудаи фаъолияти корӣ ва пеш аз ҳама авзои ҳарбӣ-сиёсии минтақаву ҷаҳонро бо ҳам мавриди таҳлилу омӯзиш қарор медиҳанд. Муҳтаво ва ҳадафи асосии ҷамъомади методӣ-таълимии навбатӣ низ аз ҳамин гуна мавзуву машғулиятҳо иборат буд.
Қобили қайд аст, ки сардорони ситод дар замони осоишта ва ҳолати ҷанг вазифаҳои муҳим ва ҳам масъулиятноки низомиро бар ӯҳда доранд. Аз ин ҷост, ки донишу малакаи касбии худро пайваста дар самти ташкил ва дар сатҳи зарурӣ идоракардани ҷузъу томҳо, омодагии ҷангиву сафарбарии қӯшунҳо, ташкили хизмати қаровуливу тартиботи дохилӣ, риояи интизоми ҳарбӣ ва ахлоқию рӯҳияи ҳайати шахсӣ ва иҷрои бомуваффақияти вазифаҳои дар наздашон буда, такмилу тақвият мебахшанд.
Ҳангоми натиҷагирӣ аз машғулиятҳои таълимӣ, ки бо иштироки масъулини Ситоди генералии Кувваҳои Мусаллаҳ доир гардид, дар рафти он зикр карда шуд, ки мо бояд бо таҳлил ва хулосабардорӣ аз вазъи кунунии ҷаҳони муосир дар фаъолияти хизматии худ масъулияти баланди корӣ нишон дода, дар маҳалли хизмат назорати дурусти ҷобаҷогузориву нигоҳдории силоҳу техникаҳои ҳарбиро мувофиқи талаботи мавҷуда ба роҳ монем, ҳолати корӣ ва омодабошии доимии онҳоро назорат намуда, дар ин замина, вазифаи асосии худ, яъне хизмати содиқона баҳри ҳифзи марзу буми кишварро дар мадди аввал ва ҳадафи асосии худ қарор диҳем.
Баъд аз ҷамбасти ҷамъомади мазкур тибқи нақша афсарони ба машғулиятҳо ҷалбгардида аз Китобхонаи миллии Тоҷикистон дидан намуда, зимнан бо шароитҳои фароҳамгардида дар он, китобу маҷмӯаҳои илмии соҳавӣ, сиёсиву ҳуқукӣ ва амсоли ин аз наздик ошно гардиданд.
Боқӣ ШАРИФОВ
