Дар ҷаласаи даъватии ҷумҳуриявӣ нахуст, Фармони Президенти Ҷумҳурии Тоҷикистон муҳтарам Эмомалӣ Раҳмон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1995-2004-уми Ҷумҳурии Тоҷикистон ба хизмати ҳарбӣ, мавриди баррасӣ ва натиҷагирӣ қарор дода шуд.
Дар ҷамъомад, муовини сарвазири мамлакат, раиси Комиссияи даъватии ҷумҳуриявӣ-Матлубахон Сатториён, намояндаи Дастгоҳи иҷроияи Президенти Ҷумҳурии Тоҷикистон, сардорони раёсату хадамоти дахлдори Вазорати мудофиа, Ситоди генералӣ, сарпрокурори ҳарбӣ, масъулини вазоратҳои тандурустӣ, маориф ва илми ҷумҳурӣ, кумитаҳои телевизион 
ва радио, кор бо ҷавон ва варзиши назди Ҳукумати Ҷумҳурии Тоҷикистон, намояндагони сохторҳои қудратии кишвар, муовинони раисони вилоятҳо ва шаҳру ноҳияҳо, комиссарони ҳарбии ҷумҳурӣ ва дигар масъулини мақомоти давлатии даъват ширкат доштанд.
Иштирокчиён зимни баромади хеш, сараввал даъвати тирамоҳии соли 2021-умро таҳлилу натиҷагирӣ намуда, вобаста ба монеаву мушкилоти ҷойдошта дар фаъолияти баъзе аз мақомоти масъули даъвати шаҳру ноҳияҳо изҳори нигаронӣ карданд. Аз ин рӯ, бо мақсади роҳ надодан ба камбудиҳо ва ҷиҳати сифатан хуб ба роҳ мондани даъвати навбатии шаҳрвандон ба хизмати ҳарбӣ таъкид карда шуд, ки дар ҳамаи шаҳру ноҳияҳои ҷумҳурӣ чорабиниҳои пешаздаъватӣ оид ба омӯзиши шахсияти даъватшавандагон ва ташкили босамари кори комиссияҳои даъватӣ дар сатҳи баланд ва мувофиқ ба меъёрҳои қонунҳои амалкунандаи соҳа роҳандозӣ карда шавад, то ки беҳтаринҳо ва пеш аз ҳама, нафарони руҳану ҷисман солим ба хизмати ҳатмии ҳарбӣ даъват карда шаванд.
Ҳамзамон, масоили омӯзиши ҳаматарафаи захираҳои даъватӣ, мутобиқ ба талаботи қонунгузории низомӣ ба роҳ мондани тайёрии тодаъватии ҷавонон баҳри адои хизмати ҳарбӣ, омода намудани мутахассисон аз ҳисоби ҷавонони синни даъватӣ, ҳамоҳангии фаъолияти мақомоти вобастаи давлатии даъват ва ҷоннок намудани корҳои мақсаднок дар рафти даъват аз масъалаҳои дигари баррасигардида дар ин ҷамъомад маҳсуб меёфт, ки аз ҷониби иштирокчиён мавриди таҳлилу омӯзиши ҳамаҷониба қарор гирифт.
Ҳамин тавр, дар қисмати охири ҷамъомад иштирокчиёни он ҷиҳати дар сатҳи баланд ва муташаккилона гузаронидани ин чорабинии муҳимми сиёсӣ-ҷамъиятӣ бо супоришҳои мушаххас вазифадор гардиданд.
Боқӣ ШАРИФЗОДА,
рӯзноманигор
