Дар доираи баргузории машқҳои мудофиаи ҳудудӣ дар ноҳияи Лахш сатҳи омодагии захираҳои сафарбарӣ, техникаву воситаҳои хоҷагии халқ ва фаъолияти мақомоти масъул мавриди санҷиш қарор дода шуд.
Чорабинии мазкур бо мақсади таҳкими иқтидори мудофиавӣ, баланд бардоштани сатҳи омодагии мақомоти давлатӣ, сохторҳои масъул ва сокинон дар ҳолатҳои зарурӣ роҳандозӣ гардида, дар он миқдори зиёди техникаву воситаҳои гуногуни хоҷагии халқ ҷамъ оварда шуданд.
Дар рафти чорабинӣ шаҳрвандон бо ҳисси баланди ватандӯстиву масъулиятшиносӣ фаъолона иштирок намуда, омодагии худро баҳри саҳмгузорӣ дар таъмини амният ва ҳифзи Ватан нишон доданд. Сокинони ноҳияи Лахш бо рӯҳияи баланди ватандӯстӣ ва дар пайравӣ аз сиёсати хирадмандонаву сулҳҷӯёнаи Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар машқҳои таълимӣ фаъолона ширкат варзиданд.
Ҳолати омодагии техникаҳо ва ҳайати шахсии даъватгардида аз ҷониби намояндагони Вазорати мудофиаи Ҷумҳурии Тоҷикистон мавриди санҷиш қарор гирифта, бо захираҳои мудофиавии ноҳия суҳбату мулоқотҳои судманд баргузор карда шуд. Масъулин ба иштирокчиён барои ҳисси баланди масъулият ва иштироки фаъолона дар чорабинии муҳими давлатӣ изҳори сипосу миннатдорӣ намуданд. Ҳамчунин чанде аз иштирокчиёни фаъол бо ифтихорнома ва сипосномаҳои Вазорати мудофиаи Ҷумҳурии Тоҷикистон қадрдонӣ гардиданд.
Мавриди зикр аст, ки дар ҷамоати деҳоти Лахши ноҳияи мазкур низ беш аз ҳазор техникаҳои хоҷагии халқ бо таъйиноти гуногун ҷамъоварӣ гардида, омодагии онҳо дар доираи машқҳои таълимӣ санҷида шуд.
Дар маҷмӯъ ба сатҳи ташкилу баргузории машқҳои таълимии мудофиаи ҳудудӣ дар ноҳияи Лахш аз ҷониби масъулин баҳои баланд дода шуда, роҳбарияти ноҳия барои ҳамкории судманд ва саҳмгузорӣ дар ташкили чорабинӣ ба намояндагони Вазорати мудофиа ва сокинони фаъоли ноҳия изҳори сипос намуданд.
Ҳамчунин дар ситоди мудофиаи ҳудудии ноҳияи Лахш масъалаҳои дигари вобаста ба баргузории машқҳои таълимии санҷишӣ мавриди баррасӣ қарор дода шуданд.
