Бо мақсади санҷиш ва баланд бардоштани сатҳи омодабошии ҳайати шахсии захираҳои эҳтиётӣ, ки дар таҳкими иқтидори мудофиавии мамлакат нақши муҳим доранд, дар ноҳияи Муъминобод ҷамъомади мудофиаи ҳудудӣ ва санҷиши ҳолати омодабошии ҳайати захираҳои сафарбарӣ баргузор гардид.
Сокинони ноҳия, ҳайати захираҳои дар эҳтиёт қарордошта аз субҳи барвақт дар макони муайяншуда ҷамъ омада, бо ҳисси баланди ватандӯстӣ ва масъулияти шаҳрвандӣ омодагии худро баҳри ҳифзу ҳимояи истиқлолу озодӣ, ваҳдати сартосарӣ, арзишҳои миллӣ ва дастовардҳои замони соҳибистиқлолии мамлакат нишон доданд.
Дар ҷамъомади мудофиаи ҳудудӣ вазири мудофиаи Ҷумҳурии Тоҷикистон, генерал-полковник Эмомалӣ Собирзода, роҳбарияти мақомоти иҷроияи ҳокимияти давлатии ноҳияи Муъминобод, масъулини сохторҳои қудратӣ ва кормандони дигар ташкилоту идораҳои дар ноҳия фаъолияткунанда иштирок намуда, инчунин теъдоди муайяни техникаву таҷҳизоти хоҷагии халқ дар макони баргузории чорабинӣ ҷамъ оварда шуданд.
Роҳбарияти Вазорати мудофиаи Ҷумҳурии Тоҷикистон ва дигар шахсони масъул дар маҳалли ҷамъшавии ҳайати захираҳои сафарбарӣ ва техникаву воситаҳои минтақаи мудофиаи ҳудудӣ бо иштирокчиён мулоқот анҷом дода, сатҳи омодабошии онҳо ва иҷрои чорабиниҳои пешбинишударо мавриди санҷиш қарор доданд.
Зимни вохӯрӣ ба шаҳрвандоне, ки пас аз гирифтани даъватномаи комиссариати ҳарбӣ сари вақт ба нуқтаҳои муайяншуда ҳозир гардидаанд, барои ҳисси баланди масъулиятшиносӣ ва омодагӣ ҷиҳати иҷрои қарзи шаҳрвандӣ изҳори сипосу миннатдорӣ баён карда шуд.
Ҳамзамон, аз ҷониби масъулин таъкид гардид, ки таҳкими иқтидори мудофиавии мамлакат ва омода нигоҳ доштани ҳайати захираҳои сафарбарӣ ҳамеша дар меҳвари таваҷҷуҳи роҳбарияти олии давлат қарор дошта, маҳз бо чунин рӯҳияи баланди ватандӯстӣ, ваҳдату ҳамдигарфаҳмӣ ва азми қавии шаҳрвандон метавон истиқлолият, тамомияти арзӣ, амният ва манфиатҳои миллии Ҷумҳурии Тоҷикистонро аз ҳар гуна хавфу таҳдидҳои эҳтимолӣ ҳифз намуд.
Дар навбати худ сокинони ноҳияи Муъминобод бо ҳисси баланди ифтихори ватандорӣ иброз доштанд, ки ҳифзи Ватан, таъмини сулҳу субот ва хизмати содиқона ба давлату миллатро вазифаи муқаддаси худ дониста, ҳамеша барои иҷрои ин рисолати пуршараф омода мебошанд.
Дар анҷоми чорабинӣ як қатор сокинони ноҳия, ки дар чорабинии мудофиаи ҳудудӣ иштироки фаъолона намуданд, бо сипосномаҳои Вазорати мудофиаи Ҷумҳурии Тоҷикистон қадрдонӣ гардиданд.
Иштироки фаъолонаи сокинони ноҳияи Муъминобод дар ин чорабинӣ аз ҳисси баланди ватандӯстӣ ва масъулиятшиносии онҳо дарак дода, омодагии сокинонро барои саҳмгузорӣ дар ҳифзи истиқлолу дастовардҳои даврони соҳибистиқлолӣ бозгӯ намуд.
