Дар ноҳияи Рӯдакӣ бо иштироки роҳбарияти Вазорати мудофиаи Ҷумҳурии Тоҷикистон, масъулини мақомоти иҷроияи ҳокимияти давлатии ноҳия, комиссариати ҳарбӣ, намояндагони сохторҳои қудратӣ ва теъдоди зиёди сокинон ҷамъомади мудофиаи ҳудудӣ ва санҷиши ҳолати омодабошии ҳайати захираҳои сафарбарӣ баргузор гардид.
Чорабинии мазкур бо мақсади санҷиши сатҳи омодагии ҳайати захираҳои сафарбарӣ, такмили ҳамоҳангии сохторҳои масъул ва баланд бардоштани қобилияти мудофиавии минтақа роҳандозӣ шуда, дар ҷараёни он масъалаҳои марбут ба омодагии захираҳои сафарбарӣ, ташкили чорабиниҳои мудофиаи ҳудудӣ ва иҷрои вазифаҳои вобаста ба таъмини амнияти давлат мавриди баррасӣ қарор гирифтанд.
Таъкид гардид, ки таҳкими иқтидори мудофиавии мамлакат, омодасобошии захираҳои сафарбарӣ ва рушди низоми мудофиаи ҳудудӣ ҳамеша дар меҳвари таваҷҷуҳи роҳбарияту Ҳукумати кишвар қарор дошта, барои иҷрои босифати вазифаҳои дар ин самт гузошташуда тадбирҳои зарурӣ амалӣ мегарданд.
Зимни ҷамъомад ҳолати омодабошии ҳайати захираҳои сафарбарӣ ва сатҳи ҳамоҳангии сохторҳои масъули ноҳия санҷида шуда, иштирокчиён омодагии худро ҷиҳати ҳифзи дастовардҳои Истиқлоли давлатӣ, таъмини амният ва ҳимояи манфиатҳои миллӣ иброз намуданд.
Масъулин иштироки фаъолонаи шаҳрвандонро дар чунин чорабиниҳо нишонаи баланди ҳисси ватандӯстӣ ва масъулиятшиносӣ арзёбӣ намуда, баргузории онҳоро дар таҳкими иқтидори мудофиавии мамлакат муҳим арзёбӣ карданд.
