Афсарони масъули самту соҳаҳои мухталифи Вазорати мудофиа, навъҳои қӯшуни Қувваҳои Мусаллаҳ, қисмҳои ҳарбии тобеи онҳо ва дигар ҷузъу томи алоҳидаи низомӣ дар ҳар як давраи омӯзиш машғулиятҳои таълимии пешбинигардидаро ба таври назариявӣ ва ҳам амалан аз худ менамоянд. Ва дар марҳилаи ниҳоии машғулиятҳо бошад бо ширкат дар ҷамъомадҳои методӣ-таълимӣ, машқҳои баталионӣ — тактикӣ ва дигар чорабиниҳои нақшавӣ фаъолияти хизматии онҳо дар давраи сипаригардида аз ҷониби ҳайати роҳбариву фармодеҳии Артиши миллӣ ҷамъбасту натиҷагирӣ карда мешавад.
Дар доираи анҷоми соли хониши низомиён ва омодагиҳо ба давраи якуми таҳсил дар Қувваҳои Мусаллаҳи мамлакат, ки он аз аввали моҳи январи соли 2023 оғоз гардидааст, дар пойгоҳи Донишкадаи ҳарбии Вазорати мудофиа бо ҷалби сардорони ситоду муовинони онҳо, афсарон оид ба сафарбарии ҷузъу том, намояндагони хадамоти қӯшун ва бехатарии хизмати ҳарбӣ аз тамоми қисму воҳидҳои низомӣ, ҷамъомади дурӯзаи методӣ-таълимӣ доир гардид.
Масъулияти ташкил ва баргузории ҷамъомадро афсарони Ситоди генералии Қувваҳои Мусаллаҳ бар ӯҳда доштанд, ки дар баробари баррасии самтҳои муассири фаъолияти корӣ бо дарназардошти пешрафту тараққиёти ҷомеаи муосир, фановариҳои ҷадиди илми ҳарбӣ ва техникаву таҷҳизоти муосири низомӣ, инчунин вазъи ҳарбӣ-сиёсии минақаву ҷаҳонро низ мавриди таҳлилу омӯзиши ҳамаҷониба қарор доданд.
Қобили қайд аст, ки сардорони Ситод дар замони осоишта ва ҳолати ҷанг вазифаҳои муҳим ва ҳам масъулиятноки низомиро бар ӯҳда доранд. Аз ин ҷост, ки донишу малакаи касбии худро пайваста дар самти ташкил ва дар сатҳи зарурӣ идора кардани ҷузъу томҳо, омодагии ҷангиву сафарбарии қӯшунҳо, ташкили хизмати қаровуливу тартиботи дохилӣ, риояи интизоми ҳарбӣ ва ахлоқию рӯҳияи ҳайати шахсӣ ва иҷрои бомуваффақияти вазифаҳои дар наздашон буда, такмилу тақвият мебахшанд. Бо ин мақсад, дар ҷамъомади навбатӣ низ мавзӯи машғулиятҳои афсарони масъули ситод, ки дар пойгоҳи моддӣ-техникии Донишкадаи ҳарбӣ ба омӯзишу баҳрабардории он фаро гирифта шудаанд, асосан тартиби самтгирӣ дар маҳал ё худ самтгирии маҳалнигорӣ, ташкили хизмати қаравулӣ ва тайёрии қаравулҳо, тартиби гузаронидани омӯзиши шаҳрвандони дар эҳтиёт қарордошта ва дигар мавзуву масъалаҳоро дар бар мегирифт.
Боқӣ ШАРИФОВ
