Дар доираи ҷамъбасти даври якуми омӯзиш дар Қувваҳои Мусаллаҳи Ҷумҳурии Тоҷикистон ва омодагиҳо ба даври якуми он, ки шурӯъ аз якуми июли соли ҷорӣ дар Артиши милии мамлакат оғоз гардид, бо ҷалби афсарони самти тайёрии ҷангии Вазорати мудофиа, сохторҳои зертобеи он, навъҳои қӯшуни Қувваҳои Мусаллаҳ, қисму воҳидҳои ҳарбӣ ва дигар ҷузъу томи алоҳидаи низомӣ, дар пойгоҳи қисми ҳарбии 08010-и Қӯшунҳои хушкигарди Вазорати мудофиа дар гарнизони Душанбе ҷамъомади методӣ-таълимӣ доир карда шуд.
Дар оғози ҷамъомад масъулини ин ниҳоди қудратии кишвар оид ба ҳадафи ташкили ҷамъомади мазкур ва ҷалби афсарони соҳа дар он баромад намуда, машғулиятҳои пешбинишударо ҷиҳати баланд бардоштани донишу таҷрибаи онҳо муњим арзёбӣ карданд.
Машғулиятҳо дар асоси фанҳои таълимии ба ин самт равонагардида ва вобаста ба мавзуву масъалаҳои ҷамъомади мазкур, ки он аосан тайёрии ҳарбии ҳайати шахсӣ, дар ҳолати дуруст нигоҳ доштани пойгоҳҳои моддӣ-таълимӣ, интизоми ҳарбӣ, тартиботи дохилӣ, тайёр намудани мутахссисон ва амсоли инро дар бар мегирифт ба таври назариявӣ мавриди омӯзишу баҳрабардорӣ қарор дода шуд.
Дар шароити муосири омодагии ҷангӣ ва амалиётҳои ҳарбӣ яке аз самтҳои муҳими фаъолияти афсарони масъули тайёрии ҷангӣ ин таъмини расонидани саривақтии кӯмаки аввалияи тиббӣ ба маҷрӯҳон мебошад.
Аз ин рӯ, дар баробари омодагии ҷисмонӣ ва тактикӣ, омӯзиши малакаҳои наҷот ва кӯмакрасонӣ низ аҳамияти аввалиндараҷа дорад. Бо назардошти муҳимияти ин матлаб қисмати амалии ҷамъомади навбатиро пеш аз ҳама расонидани кумак ба маҷрӯҳон ва ҳимояи хизматчиёни ҳарбӣ аз таъсири радиатсионӣ, кимиёвӣ ва биологӣ ҳангоми иҷрои вазифаҳои хизмативу ҷангӣ ташкил медод.
Зимни ташкили машқҳои тиббӣ дар доираи тайёрии ҷангӣ роҳбарони машғулиятҳо таъкид карданд, ки афсарон бояд мунтазам машқҳои омодагӣ барои расонидани кӯмаки аввалияро ташкил намоянд, ки дар онҳо сарбозон бо тарзҳои бастани захм, расонидани кӯмак дар ҳолати хунравӣ, шикастагӣ, безраргардонии ҷароҳат ва интиқоли маҷрӯҳон шинос шаванд.
Дар рафти машқҳои амалӣ вобаста ба дастовардҳои назарраси соҳа ва омӯзиши таҷрибаҳои байналмилалӣ зикр гардид, ки дар аксари кишварҳо, махсусан дар нерӯҳои муосири ҳарбӣ, стандартҳои кӯмакрасонии тактикии тиббӣ риоя карда мешаванд. Хушбахтона, афсарони тоҷик низ ин таҷрибаро доранд ва онро дар раванди машқҳо татбиқ менамоянд.
Умуман, расонидани кӯмак ба маҷрӯҳон на танҳо як вазифаи тиббӣ, балки як унсури муҳими амнияти ҳарбӣ ва масъулияти ҳар як афсари самти тайёрии ҷангӣ мебошад.
Ҳимояи хизматчиёни ҳарбӣ аз таъсири радиатсионӣ, кимиёвӣ ва биологӣ яке аз ҷанбаҳои муҳимтарини таъмини амнияти шахсият дар шароити ҷанг ва ҳолатҳои фавқулода ба ҳисоб меравад.
Яке аз воситаҳои асосии ҳимоя ин истифода ниқобҳои муҳофизатӣ мебошад. Дар робита ба ин зимни ҷамъомад аз ҷониби афсарони соҳибтаҷриба сохт, намуд ва тарзи истифода бурдани ниқобҳо ва дигар лавозимоти муҳофизатӣ, машқҳои мунтазам барои пӯшидан ва истифодаи дурусти ниқобҳо, қобилияти муҳофизатӣ, огоҳӣ аз аломатҳои заҳролудшавиву сироятёбӣ ва роҳҳои паст кардани хавфи онҳо фаҳмонида шуд. Воқеан, истифодаи ниқобҳои муҳофизатӣ дар ҳимояи хизматчиёни ҳарбӣ аз таъсири радиатсионӣ, кимиёвӣ ва биологӣ нақши асосӣ мебозад.
Ҳамзамон, дар рафти ин ҷамъомад аз ҷониби сарбозони қисми ҳарбӣ машқҳо бо силоҳ нишондодашуда, зимнан ҳайати шахсӣ аз пойгоҳи моддӣ-таълимӣ, ки ба даври навбатии таҳсил дар ин қисми низомӣ пешбинӣ гардидааст дидан намуданд.
Боқӣ ШАРИФӢ,
подполковник
