Афсарон оид ба корҳои сиёсӣ-тарбиявӣ дар замони осоишта ва ҳолати ҷанг ба риояи интизоми ҳарбӣ, ҳолати ахлоқию равонӣ ва тайёрии ҷамъиятию гуманитарии ҳайати шахсӣ масъул буда, ҳамзамон фаъолияти босамари корҳои марбут ба ҳимояи иҷтимоиву ҳуқуқии хизматчиёни ҳарбӣ, аъзои оилаҳои онҳо, афроди ғайринизомӣ, таъминоти иттилоотӣ ва фарҳангиву фароғатиро низ ба зима доранд.
Ин аст, ки бо мақсади таъмини ҳолати ахлоқиву равонии хизматчиёни ҳарбии Қувваҳои Мусаллаҳ афсарони соҳа пайваста дар пойгоҳи қисму воҳидҳои низомӣ ва муассисаҳои таълимии ҳарбӣ чорабиниҳои гуногуни низомӣ, ҷамъомадҳои фарҳангӣ-фароғатӣ ва тарбиявию маърифатӣ доир намуда, ҳамчунин бо ҷалби намояндагони аҳли зиё, сохторҳои гуногуни давлативу қудратӣ ва дигар қишри фаъоли ҷомеа форумҳо, ҷаласаву чорабиниҳои корӣ ва конфронсҳои илмӣ-амалиро ташкилу ба роҳ мемонанд.
Ҷамъомади методӣ-таълимии навбатӣ бо иштироки ҳайати роҳбарии мақомоти корҳои сиёсӣ-тарбиявии Вазорати мудофиа, навъи қӯшунҳо, қисму воҳидҳои низомӣ, муассисаҳои таълимӣ ва дигар ҷузъу томи низомӣ доир гардид ва зимни оғоз дар “Кохи Афсарон”-и Вазорати мудофиа аз ҷониби намояндагони бахшу соҳаҳои гуоногун ва олимону муҳаққиқон як қатор мавзӯъҳои соҳавӣ мавриди омӯзишу баҳрабардорӣ қарор гирифт.
Иштирокчиёни ҷамъомад бо пешниҳоди маърӯзаҳо дар мавзӯи баланд бардоштани ҳисси ватандӯстиву ватанпарварӣ, ғуруру ифтихори миллӣ, риояи интизоми ҳарбӣ ва тартиботу волоияти қонун дар байни хизматчиёни ҳарбӣ баромад намуда, ҳамзамон бо дарназардошти вазъи ҳарбӣ-сиёсии минтақа ва ҷаҳон масоили марбут ба ин самтро низ муҳокима намудаанд.
Тавре қайд карда шуд, афсарон оид ба корҳои сиёсӣ-тарбиявӣ дар сафи Қувваҳои Мусаллаҳ вазифаҳои пурмасъулро ба зима доранд. Зеро, корҳои тарбиявӣ воситаи таъсиррасонии равонӣ ба шуур ва рафтори шахс мебошад. Дар раванди тазодҳои сиёсӣ ва бӯҳронҳои маънавӣ масъалаи мустаҳкам кардани пояҳои ахлоқӣ, интизоми ҳарбӣ, ташаккули маърифати ҳуқуқию сиёсӣ ва дар ин замина баланд бардоштани эҳсоси худшиносиву худогоҳии ҳайати шахсӣ яке аз вазифаҳои аввалиндараҷаи афсарони ин самти фаъолият гардидааст. Аз ин ҷост, ки дар доираи баргузории ҷамъомади навбатӣ, афсарони соҳаи корҳои сиёсӣ-тарбиявии Вазорати мудофиа ва навъҳои қӯшуни он, аз мавзеъҳои таърихиву диданибоби пойтахти азизмон-шаҳри Душанбе, аз ҷумла “Кохи Наврӯз”, дидан намуданд.
Бояд ёдовар шуд, ки ҳар дафъа зимни баргузории чунин ҷамъомадҳо афсарон оид ба корҳои сиёси-тарбиявии қисму воҳидҳои низомии Қувваҳои Мусаллаҳи мамлакат, аз маконҳои таърихӣ ва ёдгориҳои арзишманди фарҳангии кишвар дидан менамоянд. Албата, ин имконе хубе аст барои афсарони соҳа, то ки бо ин гуна мавзеъҳо аз наздик шинос шуда, сарбозонро дар рӯҳияи пос доштани муқаддасоти миллӣ ва ҳифзи дастовардҳои даврони соҳибистиқлолии Тоҷикистони азиз тарбия намоянд.
Зимни натиҷагирии ҷамъомади методӣ-таълимии навбатӣ масъулини роҳбарикунандаи ин самти фаъолият дар Қувваҳои Мусаллаҳ, вобаста ба баланд бардоштани ҳисси худшиносӣ, садоқат ба Ватан ва Савганди ҳарбӣ ибрози андеша намуда, таъкид карданд, ки масъалаи таълиму тарбияи ҳаматарафаи ҳайати шахсӣ, такмили маърифати сиёсиву ҳуқуқии ҳар як хизматчии низомӣ дар шароити феълӣ аз ҳар як афсари соҳа, ки пешбурди таълиму тарбияро миёни ҳайати шахсӣ бар зима доранд, масъулияти баланд дар хизмат ва фаъолияти ҳамарӯзаро тақозо менамояд.
Боқӣ ШАРИФОВ
майор
