Бо мақсади таъмини ҳолати ахлоқиву равонии хизматчиёни ҳарбии Қувваҳои Мусаллаҳ афсарони самти корҳои сиёсӣ-тарбиявӣ пайваста дар пойгоҳи қисму воҳидҳои низомӣ ва муассисаҳои таълимии ҳарбӣ чорабиниҳои гуногуни низомӣ, ҷамъомадҳои фарҳангӣ-фароғатӣ ва тарбиявиву маърифатӣ доир намуда, ҳамчунин бо ҷалби намояндагони аҳли зиё, сохторҳои гуногуни давлативу қудратӣ ва дигар қишри фаъоли ҷомеа форумҳо, ҷаласаву чорабиниҳои корӣ ва конфронсҳои илмӣ-амалиро ташкилу ба роҳ мемонанд.
Ҷамъомади дурӯзаи методӣ-таълимие, ки бо роҳбарият ва афсарони корҳои сиёсӣ-тарбиявии Вазорати мудофиа, навъи қӯшунҳо, қисму воҳидҳои низомӣ, муассисаҳои таълимӣ ва дигар ҷузъу томи низомӣ доир гардид, зимни оғози он дар толори қисми низомии 02615 аз ҷониби масъулин ва меҳмонони иштирокдошта як қатор мавзӯъҳои соҳавӣ мавриди омӯзишу баҳрабардорӣ қарор гирифт.
Иштирокчиён бо пешниҳоди маърӯзаҳо дар мавзӯи баланд бардоштани ҳисси ватандӯстиву ватанпарварӣ, ғуруру ифтихори миллӣ, риояи интизоми ҳарбӣ, тартиботу волоияти қонун дар байни хизматчиёни ҳарбӣ ва татбиқи бомароми сиёсати давлатии ҷавон баромад намуда, ҳамзамон бо дарназардошти вазъи ҳарбӣ-сиёсии минтақа ва ҷаҳон масоили марбут ба ин самтро низ муҳокима намудаанд.
Дар идома ҳайати иштирокчиёни ҷамъомади методӣ-таълимӣ дар яке аз марказҳои таълимии Қӯшунҳои хушкигарди Қувваҳои Мусаллаҳ машғулияти назариявии азхуднамудаашонро дар амал тадбиқ намуданд. Иштирокчиён аз китобхона, хонаҳои фароғативу хизмати маишӣ, гӯшаи ҳунарҳои мардумӣ ва дигар нақтаҳои вобаста ба самти фаъолияти корҳои сиёсӣ-тарбиявӣ дидан намуда, вазифадор гардиданд, ки ҷиҳати пешбурди фаъолияти пурсамари хеш аз чунин тартиби пешбинигардида кор баранд.
Зимни ҷамъбасту натиҷагирии ҷамъомади методӣ-таълимии навбатӣ масъулини роҳбарикунандаи ин самти фаъолият дар Қувваҳои Мусаллаҳ, вобаста ба баланд бардоштани ҳисси худшиносӣ, садоқат ба Ватан ва Савганди ҳарбӣ ибрози андеша намуда, таъкид карданд, ки масъалаи таълиму тарбияи ҳаматарафаи ҳайати шахсӣ, такмили маърифати сиёсиву ҳуқуқии ҳар як хизматчии низомӣ дар шароити феълӣ аз ҳар як афсари соҳа, ки пешбурди таълиму тарбияро миёни ҳайати шахсӣ бар зима доранд, масъулияти баланд дар хизмат ва фаъолияти ҳамарӯзаро тақозо менамояд.
Шоҳин ШАРИФЗОДА
