Имрӯз дар машқгоҳи низомии “Ҳарбмайдон”-и гарнизони Хатлон даври ниҳоии маҷмӯи машқҳои муштараки амалиётӣ-стратегии Қувваҳои Мусаллаҳи Ҷумҳурии Тоҷикистону Федератсияи Россия, бо истифодаи авиатсияи ҷангӣ, танку тӯп ва бо ҷалби ҷузъу томи пиёданизоми мусаллаҳу муҷаҳҳаз бо силоҳу муҳиммоти мухталифи ҳарбии ду давлат ҷамъбаст карда шуд.
Бо мақсади натиҷагирӣ намудани даври ниҳоии машқҳои муштараки амалиётӣ-стратегӣ, ё худ марҳилаи 5-уми ин размоиши низомӣ вазири мудофиаи Ҷумҳурии Тоҷикистон генерал-лейтенант Эмомалӣ Собирзода, ҳайати фармондеҳии ҳавзаи марказии ҳарбии Қувваҳои Мусаллаҳи Федератсияи Россия генерал-лейтенант Дмитрий Глушенков, масъулини мақомоти иҷроияи ҳокимияти давлатии 25 шаҳру навоҳии гарнизони Хатлон, роҳбарони сохторҳои қудративу мақомоти ҳифзи ҳуқуқи ин минтақа ва дигар шахсони расмӣ ба машқгоҳи “Ҳарбмайдон” омаданд.
Амалиёти муштараки ҷузъу томи Қувваҳои Мусаллаҳи Ҷумҳурии Тоҷикистону Федератсияи Россия, аз рӯйи мавзӯи пешгирӣ намудани убури ѓайриқонунии марз дар мавзеъҳои стратегӣ, торумор кардани душманони шартӣ дар бинову иншооти муҳими давлатӣ, дастгиру безарар намудани афроди сарҳадшиканро дар шароити дашту саҳро, маҳаллаҳои аҳолинишин ва роҳҳои душворгузари кӯҳистони ҳудуди ҷумҳурӣ дар бар мегирифт.
Бо мақсади дар сатҳи баланд иҷро намудани вазифаҳои ҷангӣ дар ин размоиши муштараки амалиётӣ-стратегӣ, теъдоди муайяншудаи хизматчиёни ҳарбии Қувваҳои Мусаллаҳи Тоҷикистону Россия ҷалб гардида, ҳамзамон миқдори зиёди техникаҳои зиреҳпӯши ҷангиву махсус, воситаҳои гуногуни артиллерӣ, силоҳу муҳиммоти мухталифи ҳозиразамони ҳарбӣ, авиатсияи ҷангиву нақлиётӣ, аз ҷумла чархболҳои МИ-8, МИ-24, ҳавопаймоҳои бомбаандози қиркунанда, техникаҳои автомобилӣ ва дигар лавозимоти махсуси низомӣ дар машқгоҳи “Ҳарбмайдон” алайҳи душманони эҳтимолӣ истифода шуданд.
Зимни ҷамъбасти даври ниҳоии машқҳои муштараки амалиётӣ-стратегӣ, вазири мудофиаи кишвар, Эмомалӣ Собирзода ва ҳайати фармондеҳии ҳавзаи марказии ҳарбии Қувваҳои Мусаллаҳи Федератсияи Россия Дмитрий Глушенков дар назди ҳайати иштирокчиёни тамринҳои васеи низомӣ баромад карда, вобаста ба таваҷҷӯҳи доимии Пешвои миллат муҳтарам Эмомалӣ Раҳмон дар самти таҳкими сулҳу суботи мамлакат, амнияти давлату миллат, сиёсати дифоии кишвар, таҳдиди хатарҳои эҳтимолӣ, аз даст надодани ҳушёриву зиракӣ, сайқали маҳорати касбиву омодабошии доимии ҷангӣ ва баҳри боз ҳам баланд бардоштани иқтидори мудофиавии мамлакат ибрози андеша намуданд. Ҳамзамон, оид ба ҳамкориҳои мутақобилан судманди низомии Тоҷикистону Россия, дар самти пайваста ташкилу ба роҳ мондани тамринҳои васеи низомӣ ва саҳмгузорӣ дар муборизаи муштараки зиддитеррористӣ, изҳори қаноатмандӣ карданд.
Баъд аз тақдими медалу ифтихорномаҳо ва дигар туҳфаҳои хотиравӣ ба иштирокчиёни фаъоли ин чорабинии ҳарбӣ, гузашти низомии ҳайати шахсӣ ё худ ҷузъу томи дар ин размоиш ширкатнамуда доир шуд, ки он анҷомбахши даври ҷамъбастии маҷмӯи машқҳои муштараки амалиётӣ-стратегӣ дар гарнизони Хатлон гардид.
Фаридун МАҲМАДАЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
полковник
