Имрӯз дар машқгоҳи ҳарбии “Ҳомиён”-и минтақаи Кӯлоби вилояти Хатлон, бо ҷалби беш аз ҳазор нафар хизматчиёни ҳарбии ҷузъу томи Қувваҳои Мусаллаҳи Ҷумҳурии Тоҷикистону Федератсияи Россия, маҷмӯи машқҳои муштараки баталионӣ-тактикӣ, ки аз 12 то 22-юми октябри соли равон идома дошт, ҷамъбасту натиҷагирӣ карда шуд.
Барои дар сатҳи баланд ташкилу ба роҳ мондани машқҳои муштарак, дар машқгоҳи низомии “Ҳомиён” ду бино бо тарҳи замонавӣ сохта шудааст, ки дар дохили он мавзеи махсус барои назорати машқҳо, толори хурди алоҳида барои суҳбату машварат, утоқҳои кориву хизматӣ муҳайё карда шуда, бинои дуюм бошад, аз нуқтаи тиббӣ, ошхона, ҳаммомхона ва аз дигар ҳуҷраҳои ёрирасон иборат мебошад. Илова бар ин, дар атрофи бинову иншооти мазкур, барои фаъолияти мунтазами гурӯҳҳои амалиётӣ нуқтаи фармондеҳии саҳроӣ ва баҳри муайян ва мушаххас намудани матлаби ба машқҳо пешбинигардида тамсила, ё худ макет низ бунёд карда шудааст.
Бо ҳамин тартиб, размоиши муштараки низомӣ дар машқгоҳи ҳарбии “Ҳомиён” аз рӯйи мавзӯи пешгирӣ
намудани убури ғайриқонунии марз, дастгиру безарар гардонидани афроди сарҳадшикан, торумор намудани душманони шартӣ дар шароити дашту саҳро, мавзеъҳои стратегӣ ва роҳҳои душворгузари кӯҳистони ҷумҳурӣ сурат гирифта, ҳайати таъйиншудаи низомиёни ду кишвар дар ҳамоҳангӣ, вазифаҳои ҷангиро дар сатҳи баланд иҷро намуданд.
Ҷараёни баргузории машқҳои муштараки ҷузъу томи Қувваҳои Мусаллаҳи Тоҷикистону Россия, дар машқгоҳи низомии “Ҳомиён”-и минтақаи Кӯлоб, аз ҷониби котиби Шӯрои амнияти ҷумҳурӣ, роҳбарияти Вазорати мудофиаи кишвар, сардори Ситоди муттаҳидаи СААД, муовини фармондеҳи Ҳавзаи марказии ҳарбии Федератсияи Россия, намояндагони ВАО-и дохиливу хориҷӣ ва дигар шахсони расмӣ назорат гардид.
Дар размоиши муштараки баталионӣ-тактикӣ аз ҳарду ҷониб ҳазор нафар ҳайати шахсии ҷузъу томи пиёданизоми мусаллаҳу муҷаҳҳаз, бо силоҳу муҳиммоти ҳарбӣ ва дигар лавозимоти мухталифи ҷангии Тоҷикистону Россия ширкати фаъолона намуда, дар он техникаҳои вазнини зиреҳпӯши ҷангӣ, чархболу ҳавопаймоҳои ҳарбиву нақлиётӣ, воситаҳои гуногуни артиллерӣ ва дигар аслиҳаи оташфишони муосири низомӣ истифода шуданд.
Машқҳои муштараки ҳарбӣ, ки ҳимояи марзҳои қисмати ҷанубиву шарқии кишварро вобаста ба релефи ҷуғрофӣ бо ҳисоби хати марзҳои давлатии Тоҷикистон дар масоҳати беш аз 200 километр дарозӣ ва 35 километр самти умқӣ аз таҳдиди хатарҳои эҳтимолӣ дар бар мегирифт, ки низомиёни тоҷику рус тибқи матлаби амалиёт, вазифаҳои ҷангии дар наздашон гузошташударо бо маҳорати баланди касбӣ иҷро намуда, ҳама ҳадафҳои ниҳоиро, ки таҷассумгари душманони шартӣ буданд, бе хато зада афтонданд.
Зимни натиҷагирӣ аз даври ниҳоии маҷмӯи машқҳои муштараки Тоҷикистону Россия оид ба дастуру
супоришҳои Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон, дар самти сиёсати дифоии кишвар, омодагӣ баҳри пешгирӣ аз таҳдиди хатарҳо, вазъи зудтағйирёбанда ва бисёр ҳассосу пешгӯйинашавандаи минтақа ва ҷаҳон, номуътадилӣ дар Афғонистон ва роҷеъ ба сатҳи боз ҳам баланд бардоштани иқтидори мудофиавии давлат, котиби Шӯрои амният, вазири мудофиаи мамлакат дар назди иштирокчиёни ин чорабинии муҳими низомӣ ибрози андеша кард.
Инчунин, сардори Ситоди муттаҳидаи СААД, фармондеҳи Ҳавзаи марказии ҳарбии Федератсияи Россия низ дар навбати худ моҳият ва ҳадафи баргузории чунин тамринҳои васеи низомиро барои таъмини амнияти давлату миллат муҳиму манфиатбахш арзёбӣ намуданд. Ҳамзамон, оид ба ҳамкориҳои мутақобилан судманди низомии Тоҷикистону Россия вобаста ба ташкилу пайваста ба роҳ мондани тамринҳои васеи низомӣ ва саҳмгузорӣ дар муборизаи муштараки зиддитеррористӣ изҳори қаноатмандӣ намуданд.
Дар охир, фаъолони машқҳои муштараки низомӣ бо медалу ифтихорномаҳо ва дигар туҳфаҳои хотиравӣ сарфароз гардонида шуданд. Расми гузашти низомӣ бошад, анҷомбахши машқҳои васеи низомии Тоҷикистону Россия дар машқгоҳи низомии “Ҳомиён”-и минтақаи Кӯлоб гардид.
Фаридун МАҲМАДАЛИЗОДА,
сардори Маркази матбуот,
полковник
