Хизматчиёни ҳарбии Дастгоҳи марказии Вазорати мудофиа, Ситоди генералии Қувваҳои Мусаллаҳ, раёсатҳои навъи қӯшун ва кафедраҳои ҳарбии назди муассисаҳои олии касбии мамлакат соли таҳсили 2023-ро бо нишондодҳои назарраси таълимӣ ҷамъбаст намуда, баҳри натиҷагирии он дар назди афсарони масъули раёсату шӯъбаҳои дахлдори ин ниҳоди қудратӣ аз машғулиятҳои фаннии омӯхташуда ба таври назариявӣ ва ҳам амалан санҷишу имтиҳон месупоранд.
Машғулиятҳои амалии тирпарронии афсарони ин ниҳоди қудратии кишвар чун ҳар вақта ин навбат низ дар пойгоҳи таълимии машқгоҳи саҳроии Фахробод доир гардид. Тибқи талаботи доимӣ ва дар асоси меъёрҳои истифодабарии аслиҳаҳои ҷангӣ нахуст ҳайати шахсӣ бо қоидаҳои бехатарӣ ҳангоми кор бо силоҳ ва дар вақти тирпарронии ҷангӣ шинос карда шуданд.
Сипас, ҳайати афсарони ҷалбгардида ба машғулиятҳои амалии санҷишӣ ба гурӯҳҳо ҷудо шуда, дар нуқтаҳои таълимии муайянгардида бо истифода аз навъҳои аслиҳаҳои оташфишони ҷангӣ, тирпарронӣ намуданд.
Бояд ёдовар шуд, ки ба чунин машқҳои таълимиву санҷишӣ хизматчиёни ҳарбӣ, аз сарбози қаторӣ то афсари олирутбаи Артиши миллӣ тибқи нақша пайваста ҷалб карда мешаванд. Яъне, онҳо дар истифодаи техникањои мухталифи вазнини љангї ва силоҳу муњимоти гуногуни њарбии ба худ вобастагардида маҳорати баланд доранд ва зимни қабули ҳар як санҷишу имтиҳонҳо сазовори баҳои муносиб мегарданд.
Воқеан, омодагии сатҳи баланд дар ҳифзу ҳимояи марзу буми Ватан аз истифодаи моҳиронаи силоҳу муҳиммоти ҷангӣ, техникаву мошинҳои махсуси низомӣ ва дигар воситаҳои ҳозиразамони ҳарбӣ вобастагии зич дошта, аз афсарону сарбозони Қувваҳои Мусаллаҳи мамлакат донишу малакаи баланди касбиро талаб менамояд.
Омодагии ҷисмонӣ ва варзиш низ яке аз самтҳои асосии фаъолияти хизматчиёни ҳарбии Қувваҳои Мусаллаҳ ба ҳисоб рафта, дар таъмини сатҳи тайёрии ҷангӣ нақши муҳим мебозад. Аз ин ҷост, ки ба мисли дигар фанҳои таълимӣ, афсарону сарбозон ба машқу тамрини ҷисмонӣ ва машғулиятҳои варзишӣ ҷалб карда мешаванд ва аз натиҷаи он зимни ҷамъбасти ҳар як давраи таълимӣ дар назди мутахассисони Клуби марказии варзишии артиши Вазорати мудофиа санҷиш месупоранд. Санҷиши машғулиятҳои тайёрии ҷисмониро афсарони Дастгоҳи марказии Вазорати мудофиа, Ситоди генералии Қувваҳои Мусаллаҳ ва дигар сохторҳои зертобеи он вобаста ба ҷамъбасту натиҷагириро аз соли равон бо муваффақият супоридаанд ва айни ҳол ба даври навбатии омўзишӣ, ки он аз аввали мҳи январи соли 2024-ум оғоз мегардад омодагии ҳамаҷониба дида истодаанд.
Боқӣ ШАРИФОВ
майор
