Ба истиқболи 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон аввалин маротиба бо ташаббуси Вазорати мудофиаи мамлакат миёни оркестрҳои ҳарбии ҷузъу томи вазорат ва дигар сохторҳои қудратӣ, фестивал — озмун ташкилу баргузор карда шуд.
Дар чорабинӣ вазири мудофиаи Ҷумҳурии Тоҷикистон генерал-полковник Эмомалӣ Собирзода, ҳайати намояндагон аз сохторҳои қудратӣ ва афсарону сарбозони Қувваҳои Мусаллаҳ иштирок намуданд.
Ҷиҳати иштирок дар даври ниҳоии озмуни мазкур ҳайати оркестрҳои ҳарбӣ — нафасии сохторҳои қудратии мамлакат, дар толори консертии Мактаби мусиқии бачагонаи ба номи Одина Ҳошим ба ҳам омаданд. Бахотири дар сатҳи баланд доир гардидани ин чорабинии фарҳангии муҳими низомӣ, аз тарафи Вазорати мудофиа шароити зарурӣ фароҳам гардида буд.
Дар фестивал -озмуни фарҳангӣ наздики 400 нафар ҳунармандон ва навозандагони асбобоҳои нафасӣ ширкат варзида, шартҳои ба озмун пешбинигардида, аз ҷумла намоиши оркестрҳои ҳарбӣ, навозиш ва ҳаракатҳои сафӣ, яъне дефиле ва навозиши асбобҳои миллии тоҷикиро бо маҳорати баланди касбӣ иҷро намуданд.
Лозим ба таъкид аст, ки баробари оркестрҳои ҷузъу томи Вазорати мудофиа, инчунин дастаҳои мусиқачиён аз Гвардияи миллӣ ва Қӯшунҳои дохилии Вазорати корҳои дохилӣ ширкат намуда, иҷроиши зебову ҷолиб намоиш доданд.
Фестивал озмуни мазкур, ки дар замони соҳибистиқлолии кишвар аввалин маротиба дар чунин сатҳ ташкилу гузаронида шуд, баҳри дарёфти чеҳраҳои нав, ҷалби мусиқачиён аз миёни сохторҳои қудратӣ ва эҷоди оҳангҳои нави низомӣ мусоидат менамояд.
Маротибаҳо собит гардидааст, ки Оркестрҳои муттаҳидаи Қувваҳои Мусаллаҳи Ҷумҳурии Тоҷикисон зимни баргузории ҷамъомаду чорабиниҳои муҳими сатҳи давлатӣ, аз ҷумла пардаҳои ҳарбӣ ва дигар чорабиниҳои сиёсиву фарҳангӣ дар дохили кишвар пайваста иштирок намуда, берун аз миқёси ҷумҳурӣ низ ҳамасола дар фестивал — озмунҳои байналмилалии оркестрҳои ҳарбӣ — нафасӣ, муаррифкунандаи давлату миллат гаштаанд.
Пас аз намоиши ҳунару маҳорат ва санъати ҳарбӣ аз тарафи ҳайати ҳакамон, ки аз ҳисоби мутахассисони варзидаву шинохтаи соҳаи фарҳанг интихоб гардида буданд, ғолибони фестивал — озмун муайян карда шуда, бо ифтихорнома ва тӯҳфаҳои арзишманди Вазорати мудофиаи мамлакат қадрдонӣ шуданд.
Ёдовар мешавем, ки “Фестивал – озмун байни оркестрҳои ҳарбии Вазорати мудофиа ва дигар сохторҳои қудратии Қувваҳои Мусаллаҳ” минбаъд низ идома меёбад.
