Ҷаласаи 6-уми Гурӯҳи кории байнидавлатӣ оид ба татбиқи тадбирҳои низоми ягонаи фарогирии техникии роҳҳои оҳани кишварҳои узви Созмони Аҳдномаи амнияти дастҷамъӣ, ки давоми ду рӯз дар шаҳри Душанбе доир гашт, ба анҷом расид.
Зимни ин ҷаласа намояндагони ҷумҳурияҳои Беларус, Қазоқистон, Қирғизистон, Русия, Тоҷикистон ва Котиботи Ситоди муштараки СААД гузориши аъзои гурӯҳро дар бораи натиҷаи кор дар самти банақшагирӣ ва ташкили тадбирҳои дастгирии техникии роҳҳои оҳани кишварҳои узви СААД шуниданд.
Аъзои гурӯҳи кории байнидавлатӣ дар фазои созанда оид ба ҳалли масъалаҳои муҳимтарини таъмини техникии роҳи оҳан табодули афкор намуда, дурнамои ҳамкориҳои минбаъдаи зич байни вазорату идораҳои аъзои ин созмон ҷиҳати ташкили фаъолияти бефосилаи нақлиёти роҳи оҳан дар кишварҳои узви СААД-ро баррасӣ намуданд.
Ҷаласа бо имзои Протокол аз ҷониби роҳбарияти Гурӯҳи кории байнидавлатӣ ба анҷом расид.
Маркази матбуот ва иттилооти
Вазорати мудофиаи Ҷумхурии Тоҷикистон
