Вобаста ба иҷрои талаботи Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006-и Ҷумҳурии Тоҷикистон ба хизмати ҳарбӣ”, дар Вазорати мудофиаи мамлакат бо иштироки муовини сарвазири Ҷумҳурии Тоҷикистон-раиси комиссияи даъвати ҷумҳуриявӣ Дилрабо Мансурӣ, ҳайати роҳбариву фармондеҳии Вазорати мудофиа, намояндаи Дастгоҳи иҷроияи Президенти Ҷумҳурии Тоҷикистон, сарпрокурори ҳарбӣ ва дигар мақомоти вобастаи давлатии даъват, ҷаласаи комиссияи даъвати ҷумҳуриявӣ баргузор гардид.
Дар кори ҷаласа, ки рӯзномаи он масъалаҳои вобаста ба даъвати баҳории соли ҷорӣ ва тартиби адои хизмати ҳарбӣ дар ҳайати захираҳои даъвати сафарбариро дар бар мегирифт, масъулин зимни баромади худ пеш аз ҳама натиҷаи даъватҳои пешин ва сатҳу сифати хизмат дар ҳайати захираҳои даъвати сафарбариро мавриди таҳлилу баррасӣ қарор дода, дар самтҳои зикргардида шахсони масъулро бо супоришҳои мушаххас вазифадор намуданд.
Аз ҷумла, ҷиҳати иҷрои дастуру супоришҳои Роҳбарияти олии мамлакат, талаботи санадҳои меъёрӣ-ҳуқуқии амалкунанда дар соҳаи даъват ва вобаста ба теъдоди умумии захираҳои даъватӣ дар мамлакат таъкид карда шуд, ки дар мавсими навбатии даъват ва муҳлати пешбинигардида ба он, мақомоти вобастагардидаро зарур аст бо масъулияти баланд ва дарки муҳиммияти ин чорабинии сиёсӣ-ҷамъиятӣ амал намуда, дар заминаи корҳои анҷомдодашудаи тодаъватӣ ва омӯзиши пешакии даъватшавандагон, ҷавонони рӯҳану ҷисман солим ва аз ҳама лиҳоз обутобёфтаро ба сафи Қувваҳои Мусаллаҳ баҳри хизмат ба халқу Ватан равона намоянд.
Ҳамзамон, масоили омӯзиши ҳаматарафаи захираҳои даъватӣ, мутобиқ ба талаботи қонунгузории низомӣ ба роҳ мондани тайёрии тодаъватии ҷавонон баҳри адои хизмати ҳарбӣ, омода намудани мутахассисон аз ҳисоби ҷавонони синни даъватӣ, ҳамоҳангии фаъолияти мақомоти вобастаи давлатии даъват ва ҷоннок намудани корҳои мақсаднок дар рафти даъват аз масъалаҳои дигари баррасигардида дар ин ҷамъомад маҳсуб меёфт, ки аз ҷониби иштирокчиён маврди таҳлилу омӯзиши ҳамаҷониба қарор гирифт.
Ҳамин тавр, дар қисмати охири ҷамъомад иштирокчёни он ҷиҳати дар сатҳи баланд ва муташаккилона гузаронидани ин чорабинии муҳими сиёсӣ-ҷамъиятӣ бо супоришҳои мушаххас вазифадор гардиданд.
Боқӣ ШАРИФОВ
майор
