Қувваҳои Мусаллаҳи кишвар ҳамчун сохтори муташаккил ва ниҳоди масъул дар таъмини таъмини амнияту субот ва оромиву осудагии ҷомеа нақши калидӣ доранд. Бинобар ин, хизмат дар сафи он масъулияти баланд, маҳорату малакаи касбӣ ва риояи ҳатмии Оинномаҳои онро тақозо менамояд.
Дар ин замина, дар Вазорати мудофиаи Ҷумҳурии Тоҷикистон таҳти роҳбарии сардори Ситоди генералии Қувваҳои Мусалллаҳ–муовини якуми вазири мудофиаи Ҷумҳурии Тоҷикистон, генерал-лейтенант Саидзода Бобоҷон ҷаласаи ҳамоҳангсозӣ бо иштироки намояндаи Шӯрои амният ва сардорони сарситодҳои (ситодҳо) навъҳои Қувваҳои Мусаллаҳ баргузор гардид.
Ҳадафи баргузории ҷаласа таҳлилу баррасии масъалаҳои ҳолати ташкил ва пешбурди хизмати гарнизонӣ, қоидавайронкуниҳои ҳаракат дар роҳ ва вазъи бехатарии воситаҳои нақлиёти ҳарбӣ, омодагии ҳамаҷониба ба машқҳои навбатии муштараки амалиётӣ-стратегӣ бо қӯшунҳои ҳудуди гарнизони Хатлон, қувва ва воситаҳои мудофиаи ҳудудӣ буда, доир ба ин масъалаҳо масъулини Ситоди генералии Қувваҳои Мусаллаҳ баромад намуда, фикру андешаҳои худро иброз намуданд.
Ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1999-2008 Ҷумҳурии Тоҷикистон ба хизмати ҳарбӣ низ аз масъалаҳои муҳиме буд, ки дар мавриди он мубодилаи афкор сурат гирифт. Қайд гардид, ки сол аз сол сафи ҷавонони ватандӯсти кишвар, ки ихтиёран ба сафи Қувваҳои Мусаллаҳи кишвар мепайванданд, зиёд шуда истодааст. Бинобар ин, мсаъулинро зарур аст, ки ҷиҳати боз ҳам баланд бардоштани сатҳу сифати корҳои ташвиқотӣ, баланд бардоштани рӯҳияи сарбозону даъватшавандагон ва таъмини шароити мусоиди хизмат ба онҳо чораҳои зарурӣ андешанд.
Ҷаласаи ҳамоҳангсозии сардорони сарситодҳои (ситодҳо) навъҳои Қувваҳои Мусаллаҳ ва сохторҳои қудратии мамлакат бо мубодилаи афкор миёни иштирокдорон ва қабул гардидани қарорҳои дахлдор ҷамъбаст гардид.
