Бо иштироки роҳбарияти Вазорати мудофиа, фармондеҳони навъҳои Қувваҳои Мусаллаҳ, масъулини раёсату шуъбаҳо ва хадамотҳои алоҳидаи дастгоҳи марказӣ ва Ситоди генералии Қувваҳои Мусаллаҳи мамлакат ҷаласаи ғайринавбатии ҳайати мушовараи Вазорати мудофиаи Ҷумҳурии Тоҷикистон доир гардид, ки зимни он тибқи рӯзномаи маҷлис як қатор масъалаҳои муҳими соҳавӣ мавриди таҳлилу баррасӣ қарор гирифт.
Дар ҷаласа, вобаста ба таҳкими суботу амният ва масъулияти баланди хизматчиёни ҳарбӣ дар шароити мураккаби ҷаҳони имрӯз, ки дар партави таваҷҷуҳи доимии Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон қарор дорад, андешаҳои муфассал баён гардиданд. Вазири мудофиаи Ҷумҳурии Тоҷикистон, генерал-полковник Собирзода Эмомалӣ дар кори ҷаласа аз таҷлили ҷашни 35-солагии Истиқлоли давлатӣ ёдоварӣ намуда, ҷиҳати сазовор истиқбол гиирфтани он ба масъулин дастуру супоришҳоро ироа намуд.
Дар идомаи маҷлиси ҳайати мушовара муовинони вазири мудофиа ва дигар шахсони масъул ҳар яке дар самтҳои фаъолияти худ маърӯза намуданд. Дар ҷаласаи навбатӣ ба фаъолияти Муассисаи давлатии мадагори мудофиаи Вазорати мудофиа дар самти босифат тайёр кардани мутахассисон барои Қувваҳои Мусаллаҳ диққати аввалиндараҷа равона гардид. Вазъи қонуният, тартиботи ҳуқуқӣ, ҳифзи саломатии ҳайати шахсӣ, пешгирии вайрон намудани қоидаҳои ҳаракат дар роҳ аз ҷониби ронандагони воситаҳои нақлиёти автомобилии ҳарбӣ, инчунин фаъолияти хизмати қӯшун ва бехатарии хизмати ҳарбӣ дар ҷузъу томҳои Вазорати мудофиаи кишвар низ дар баромади масъулини соҳа муфассал шарҳ дода шуд.
Масоили марбут ба хизмати садоқатмандонаи ҷавонон дар сафи Қувваҳои мусаллаҳ ва раванди муназзами ҷобаҷокунии сарбозон дар ҷузъу томҳои Артиши миллӣ низ мавриди омӯзишу баррасӣ қарор гирифта, тазаккур дода шуд, ки бо саҳмгузорӣ ва дарки баланди масъулият аз ҷониби ҳар як фарди худогоҳу хештаншиноси ҷомеа нақшаи даъвати ҷавонон ба сафи Артиш дар як моҳ зиёда аз 90 фоизро ташкил намуд.
Дар фарҷом, масъулин вазифадор гардиданд, ки фаъолияти худро боз ҳам беҳтар ба роҳ монда, бо хизмати содиқона ва масъулияти баланд дар самти ҳифзи марзу бум ва суботу амнияти мамлакат саҳмгузор бошанд.
