Дар ҷаласаи Шӯрои ҳамоҳангсозии фаъолияти мақомоти ҳифзи ҳуқуқ ва идоракунии ҳарбӣ, ки дар Прокуратураи ҳарбии гарнизони Душанбе баргузор гардид, дар он татбиқи амалии Фармони Президенти Ҷумҳурии Тоҷикистон аз 5-уми марти соли 2024 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006-и Ҷумҳурии Тоҷикистон ба хизмати ҳарбӣ”, натиҷаи санҷиши ҳолати риоя ва иҷрои талаботи Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ”, “Тартиби адои хизмати ҳарбӣ дар ҳайати захираҳои сафарбарӣ” фаъолияти масъулини вобастаи давлатии даъват ва дигар мақомоти ваколатдор, кор бо захираҳои даъватӣ, пешгирӣ аз роҳҳои ғайриқонунии ҷалби ҷавонписарон ба сафи Қувваҳои Мусаллаҳи ҷумҳурӣ ва дигар масоили марбут ба чорабиниҳои даъватии шаҳрвандон ба хизмати ҳатмии ҳарбӣ, мавриди муҳокима ва натиҷагирӣ қарор дода шуд.
Иштирокчиёни ҷаласа зимни таҳлилу баррасии масъалаҳои ба миён гузошташуда, вобаста ба монеаву мушкилоти ҷойдошта дар фаъолияти баъзе аз мақомоти масъули даъватии шаҳру ноҳияҳо изҳори нигаронӣ карданд. Дар ин замина қайд карда шуд, ки новобаста аз иҷрои нақшаи даъвати шаҳрвандон ба хизмати ҳарбӣ, санҷишҳои прокурорӣ нишон медиҳанд, ки дар фаъолияти баъзе аз комиссияҳои давлатии шаҳру ноҳияҳо ҳамоно як қатор мушкилиҳо аз қабили наомӯхтани шахсияти даъватшавандаҳо, дар қайди комиссариатҳои ҳарбӣ набудани баъзе аз шаҳрвандон, муоинаи нодурусти ташхиси тиббӣ, сари вақт ҳозир нагардидани ҷавонон ба комиссияҳои даъватӣ ва баъзе аз кирдорҳои коррупсионӣ низ ошкор гардидаанд, ки нисбат ба ин гуна ашхос ҷазоҳои қонунӣ татбиқ карда шудаанд.
Дар охири ҷаласа бо мақсади бартараф намудани камбудиву монеаҳои дар боло зикргардида ва дар доираи қонунҳои амалкунанда баҳри дар сатҳи баланду бо сифати хуб ба роҳ мондани чорабиниҳои даъвати тирамоҳӣ, иштирокчиёни ҷамъомад ва дигар масъулини мақомоти вобастаи давлатии даъват бо супоришҳои мушаххас вазифадор карда шуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
