Ҷаласаи навбатии Шӯрои ҳамоҳангсозии фаъолияти мақомоти ҳифзи ҳуқуқ ва идоракунии ҳарбӣ дар Сарпрокуратураи ҳарбии Ҷумҳурии Тоҷикистон таҳти роҳбарии муовини Прокурори генералии Ҷумҳурии Тоҷикистон-Сарпркурори ҳарбӣ генерал–майори адлия Воҳидзода Ҳабибулло Сайдулло баргузор шуд.
Дар ҷаласаи Шӯро ҳайатҳои роҳбариву фармондеҳии Вазорати мудофиа, Кумитаи ҳолатҳои фавқулода ва мудофиаи гражданӣ, Агентии таъминоти амволи махсус, ҳайати фармондеҳии Қӯшунҳои сарҳадӣ, Қӯшунҳои дохилӣ, Гвардияи миллӣ, масъулони раёсатҳои молия ва буҷет, корҳои сиёсию тарбиявӣ, ақибгоҳ, комисарони ҳарбӣ, командирони қисмҳои ҳарбӣ ва прокуророни ҳарбии гарнизонҳо иштирок намуданд.
Дар ҷаласаи Шӯрои ҳамоҳангсозӣ вазъи содиршавӣ, пешгирӣ, ошкоркунӣ ва амалияи тафтишотӣ–судӣ бо ҷиноятҳои азонихудкунӣ ё исрофкорӣ, қаллобӣ ва сӯйистеъмоли ҳокимият ё аз ҳадди ваколатҳои мансабӣ ва хизматӣ баромадан дар солҳои 2022–2023 ва нимсолаи якуми соли 2024 баррасӣ гардид.
Зикр шуд, ки талаботи қонуну оинномаҳо дар вазорату идораҳои ҳарбӣ, навъи қӯшунҳо ва қисмҳои ҳарбӣ дар ин самт иҷро шуда, дар маҷмӯъ ҷиҳати даромад ва хароҷоти мақсадноки маблағҳои пулӣ ва амволи махсус барои таъмини хизматчиёни ҳарбӣ корҳои муайяне анҷом дода шудаанд.
Новобаста аз ин, талаботи қонунҳо доир ба масъалаҳои зикршуда дар баъзан маврид ба таври дахлдор иҷро нашуда, сабабу шароитҳое, ки ба содир кардани ҷиноят мусоидат мекунанд, пурра бартараф карда намешаванд. Дар робита ба ин якчанд нафар масъулони сохторҳои ҳарбӣ, ки даст ба чунин кирдорҳо задаанд, нисбати онҳо парвандаҳои ҷиноятӣ оғозу тафтиш ва бо ҳукмҳои судӣ шахсони гунаҳкор ба ҷазо маҳкум карда шуданд.
Илова бар ин дар ҷаласаи Шӯро масъулони сохторҳои ҳарбӣ муваззаф карда шуданд, ки талаботи қонунҳоро бечунучаро риоя ва иҷро намоянд ва дар доираи талаботи қонунҳо ба амал баровардани вазифаҳои хизматӣ, пурра даромаду хароҷот кардани маблағҳои буҷетӣ, маводи озуқаю амволи шайъӣ ва дигар намуди амвол, инчунин ба вазифаи сардорони хадамоти молияю хӯрока, амволи шайъӣ, мудирони анбор ва ошпазҳо таъин намудани занон–хизматчиёни ҳарбӣ низ масъалагузорӣ карда шуд.
Ҳамзамон, дар назди кормандони мақомоти прокуратураи ҳарбии ҷумҳурӣ масъалагузорӣ карда шуд, ки санҷишҳои прокурориро дар ин самт мунтазам бароҳ монда, назорати прокурориро баҳри пешгирии қонунвайронкуниҳо боз ҳам пурзӯр намоянд ва дар ин самт чораҳои иловагии самарабахш андешанд.
Сарпрокуратураи ҳарбии
Ҷумҳурии Тоҷикистон
