Тибқи нақшаи раёсати Ҷумҳурии Тоҷикистон дар Созмони ҳамкории Шанхай 28-уми июл дар шаҳри Душанбе ҷаласаи Шӯрои вазирони мудофиаи давлатҳои аъзои Созмони ҳамкории Шанхай баргузор мегардад. Ба пойтахти мамлакат-шаҳри Душанбе ҳамчунин вазирони мудофиаи Ҷумҳуриҳои Ҳиндустон, Қазоқистон, Қирғизистон, Ҷумҳурии Исломии Покистон, Федератсияи Россия, Ӯзбекистон ва Белорусия, ҳамчунин Котиби генералии Созмони ҳамкориҳои Шанхай ва роҳбарияти Кумитаи иҷроияи маркази минтақавии зиддитеррористии ин Созмон ташриф меоранд. Имрӯз вазири мудофиаи Ҷумҳурии Халқии Хитой генерал – полковник Вэй Фэнхэ бо сафари расмӣ ба Тоҷикистон ташриф оварда, ҳамзамон дар кори ҷаласаи Шӯрои вазирони мудофиаи давлатҳои аъзои Созмони ҳамкории Шанхай иштирок менамояд.
Дар Вазорати мудофиаи мамлакат аъзои Шӯрои давлатии Ҷумҳурии Халқии Хитой – вазири мудофиаи ин кишвар, генерал – полковник Вэй Фэнхэро, тибқи оини низомиён, бо саф оростани ротаи қаровули фахрӣ ва таҳти навои Оркестри ҳарбии нафасӣ вазири мудофиаи кишвар Шералӣ Мирзо истиқбол гирифт.
Дар ҷараёни вохӯри вазирони мудофиаи Тоҷикистону Чин доираи васеи масъалаҳои дуҷониба ва бисёрҷонибаи муносибатҳои низомиро дар самти ҳамкориҳои ҳарби-техникӣ барраси намуда, вобаста ба санаду созишномаҳои ҳуқуқӣ, ки қаблан дар доираи муносибатҳои низомӣ, миёни вазирони мудофиаи ҳарду кишвар ба мувофиқа расидаанд мубодилаи афкор сурат гирифт. Ҳамзамон таваҷҷуҳи зиёд ба вазъи кунунии давлати Исломии Афғонистон, масоили таъмини бехатари дар минтақаи Осиёи Марказӣ ва оид ба дигар масъалаҳои амниятӣ дар самти муборизаи муштараки зиддитерристӣ мароқ зоҳир карда шуд.
Таъкид кардан ба маврид аст, ки дар доираи омодагӣ ба баргузории ҷаласаи навбатии Шӯрои вазирони мудофиаи давлатҳои аъзои Созмони ҳамкории Шанхай, ҳамчунин вохӯрии дуҷонибаи вазири мудофиаи Тоҷикистон бо вазири мудофиаи Ҷумҳурии Исломии Покистон Парвиз Хаттак баргузор гардид.
Бояд хотирасон намуд, ки рӯзи 28 июли соли 2021 дар шаҳри Душанбе ҷаласаи навбатии Шӯрои вазирони мудофиаи давлатҳои аъзои Созмони ҳамкории Шанхай баргузор мегардад, ки дар он вазирони мудофиаи Ҷумҳуриҳои Ҳиндустон, Қазоқистон, Қирғизистон, Ҷумҳурии мардумии Чин, Ҷумҳурии Исломии Покистон, Федератсияи Россия, Ҷумҳуриҳои Тоҷикистон, Ӯзбекистон, Белорусия, Котиби генералии Созмони ҳамкории Шанхай ва Директори Кумитаи иҷроияи маркази минтақавии зиддитеррористии ин Созмон иштирок менамоянд.
Аз рӯи нақша ва тибқи барномаи баргузории ҷаласа дар назар аст, ки вазирони мудофиа масоили вобаста ба тақвияти ҳамкориҳои байниҳамдигарӣ дар доираи Созмони ҳамкории Шанхай, вазъи кунунии минтақа ва ҷаҳон, таъмини амнияту субот дар Афғонистон ва марзҳои он бо давлатҳои аъзои Созмони ҳамкории Шанхай ва дигар масъалаҳои марбут ба рӯзномаи ҷаласаро баррасӣ хоҳанд намуд. Ҳамзамон масоили вобаста ба омодагӣ ва баргузории машқҳои муштараки зиддитеррористии Қувваҳои Мусаллаҳи давлатҳои аъзои Созмони ҳамкории Шанхай, ки соли равон таҳти унвони «Рисолати сулҳҷӯёна-2021» дар ҳудуди яке аз давлатҳои аъзои ин Созмон доир мегардад, мавриди муҳокима қарор дода мешавад.
Дар назар аст, ки зимни ҷамъбасту натиҷагирӣ намудани ҷаласаи вазирони мудофиаи кишварҳои аъзои Созмони ҳамкории Шанхай, аз ҷониби иштирокчиёни он баёнияи муштарак ба имзо расонида хоҳад шуд.
Бояд тазаккур дод, ки мавзӯъҳои ҳалталаби ҷомеа ва аз байн бурдани зуҳуроти номатлуб дар минтақа, аз ҷумла, терроризму экстремизм ҳамчун масъалаи нигаронкунандаи башарият, ки дар доираи ташаббусҳои давлатҳои аъзои Созмони ҳамкории Шанхай татбиқ карда мешаванд дар меҳвари таваҷҷуҳи роҳбарияти давлату Ҳукумати Ҷумҳурии Тоҷикистон қарор доранд ва дар доираи раёсати кишвари мо дар ин созмони ҷаҳонӣ дар ин самт тадбирҳои зарурӣ андешида мешавад. Баргузории ҷаласаҳои сатҳи баланди Созмони ҳамкории Шанхай ва ташрифи меҳмонони зиёд аз кишварҳои хориҷӣ, намояндагони воломақоми давлатҳои аъзои Созмони ҳамкории Шанхай шаҳодат аз он медиҳад, ки ҷониби Тоҷикистон дар доираи давраи раёсат дар Созмони ҳамкории Шанхай ба рушду тавсеи бештари давлатҳои аъзои созмон дар тамоми соҳаҳои ҳаёти иқтисодию иҷтимоии минтақа ва ҷаҳон аҳамияти аввалиндараҷа зоҳир намуда, хостори ҳали ҳарчи зудтари мушкилоти шудаи минтақавию байналмилалӣ мебошад.
Фаридун Маҳмадализода,
Сардори Маркази матбуоти
Вазорати мудофиаи
Ҷумҳурии Тоҷикистон,
полковник
