Тайи солҳои охир даъват ба сафи Қувваҳои Мусаллаҳ дар қаламрави мамлакат рӯ ба беҳбудӣ оварда, ҷавонписарони баору номуси кишвар баъди гирифтани аввалин даъватномаҳои комиссариатҳои ҳарбӣ ба комиссияи давлатӣ ҳозир мешаванд ва иҷрои пурраи нақшаи даъват дар шаҳру ноҳияҳои мамлакат пеш аз мӯҳлат ба итмом мерасад.
Омилҳои пеш аз мӯҳлат дар бисёре аз шаҳру ноҳияҳои мамлакат иҷро гардидани нақшаи даъват агар аз як тараф ин ба дастгириву ғамхориҳои пайвастаи давлату Ҳукумати ҷумҳурӣ нисбат ба Қувваҳои Мусаллаҳ, бунёди заминаҳои хуби моддиву таълимӣ дар ҷузъу том ва ба таъмини ҳамаҷонибаи шароитҳои хизмативу майишӣ вобастагӣ дошта бошад, аз ҷониби дигар ин ба зиёд будани шумораи ҷавонони ихтиёрӣ ба сафи Артиши миллӣ, фаъолияти хубу назарраси комиссияҳои даъватӣ ва аз ҳама асос, ин пойдории фазои сулҳу суботи Тоҷикистони маҳбуб арзёбӣ мешавад, ки хушбахтона шаҳрвандони мамлакат имкон доранд, дар муҳити орому осоишта ва дар Ватани азизи худ хизмати пуршарафи Модар-Ватанро адо намоянд.
Дар доираи чорабиниҳои пеш аз даъватӣ ва бо мақсади сифатан хуб ба роҳ мондани ҷалби ҳарчӣ бештари ҷавонписарони солиму бардам ба сафи Қувваҳои Мусаллаҳи ҷумҳурӣ дар толори асосии Вазорати мудофиа ва бо ҷалби комиссарони ҳарбии вилоятҳо ва шаҳру ноҳияҳои мамлакат ҷамъомад баргузор гардид.
Дар ҷамъомад вазири мудофиаи мамлакат Шералӣ Мирзо нахуст доир ба дастуру супоришҳои Сарфармондеҳи Олии Қувваҳои Мусаллаҳ генерали артиш муҳтарам Эмомалӣ Раҳмон ибрози назар карда, даъвати баҳории соли равон ва дар маҷмуъ чорабиниҳои даъватиро дар соли сипаригашта мавриди таҳлилу баррасии ҳамаҷониба қарор дод.
Дар робита ба ин, қайд карда шуд, ки дар баробари комёбиву пешравиҳои назаррас, ҳамоно дар фаъолияти баъзе аз комиссияҳои даъватӣ як қатор камбудиҳо ба чашм мерасанд, ки он боиси нигаронӣ мебошад.
Аз ин рӯ, барои бартараф намудани ҳама гуна монеаву мушкилоти ҷойдошта супориш дода шуд, ки масъулини комиссариатҳои ҳарбии вилоятҳо ва шаҳру ноҳияҳои мамлакат, баҳри сифатан хуб ташкилу ба роҳ мондани чорабиниҳои даъватӣ, пеш аз ҳама бо мақомоти иҷроияи ҳокимияти давлатии шаҳру ноҳияҳо, аҳли ҷомеа ва мардум, ҷавонписарони синни даъватӣ, волидони онҳо, мақомоти масъули вобастаи даъват ва дигар афроди некбини ҷомеаи имрӯза ҳамкориву ҳамоҳангиро ҳамаҷониба таҳким бахшида, корҳои фаҳмондадиҳӣ ва дигар чорабиниҳои ташвиқотиву тарғиботиро дар байни аҳолӣ, ба таври густурда роҳандозӣ намоянд.
Роҳбарияти Вазорати мудофиа инчунин бо ёдоварӣ аз муроҷиати шаҳрвадон ба унвонии ӯ таъкид намуд, ки дар ҳамаи комиссариатҳои ҳарбӣ, бобати муроҷиати мардум, ки ба масъалаи даъват ва ба самту соҳаи комиссариатҳои ҳарбӣ вобастагӣ доранд, диққати ҷидди равона карда, дар доираи талаботи қонунҳои амалкунанда, бобати ҳалли мушкилоти шаҳрвандон сари вақт чораҷӯйӣ намоянд.
Масоили вобаста ба тартиби дуруст ба роҳ мондани бақайдгирии шаҳрвандон, омӯзиши шахсияти даъватшавандагон, ба талабот ҷавогӯ намудани нуқтаҳои даъват, интихобу ба сафи Қувваҳои Мусаллаҳ фиристодани ҷавонони солиму бардам ва болаёқат, пешгирӣ аз роҳҳои ғайриқонунии даъват, бо ҷалби қувваҳои эҳтиётӣ ташкилу баргузор намудани ҷамъомаду машғулиятҳои нақшавӣ, дар шаҳру ноҳияҳои ҷумҳурӣ дақиқан муайян кардани шумораи захираҳои сафарбарӣ, пешгирӣ намудани сатҳи содиршавии ҳама гуна қонуншиканиҳо, ба хусус ҷиноятҳои хусусияти коррупсионидошта ва диққати аввалиндараҷа равона кардан ба сатҳу сифати даъвати ҷавонписарон, яке аз масъалаҳои муҳиму баррасишавандаи ҷамъомад ба ҳисоб мерафт.
Фаридун МАҲМАДАЛИЗОДА,
полковник
