Дар Прокуратураи ҳарбии гарнизони Бохтар бо иштироки масъулини ниҳодҳои дахлдор ҷаласаи Шӯрои ҳамоҳангсозии фаъолияти мақомоти ҳифзи ҳуқуқ ва сохторҳои ҳарбии гарнизон доир гардид. Дар кори ҷаласа масоили марбут ба натиҷагирӣ аз тафтишоти судӣ, пешгирии ҳолатҳои ҷинояткорӣ ва боз ҳам устувортар гардонидани муносибати хуби байниҳамдигарии сарбозон дар доираи талаботи оинномаҳои ҳарбӣ мавриди таҳлилу баррасӣ қарор гирифт.
Баргузории Шӯрои навбатии ҳамоҳангсозии фаъолияти мақомоти ҳифзи ҳуқуқ ва сохторҳои ҳарбӣ дар ин гарнизон идомаи татбиқу амалигардии дастуру супоришҳои Пешвои миллат муҳтарам Эмомалӣ Раҳмон арзёбӣ гардида, аз тадбирҳои афзалиятноки масъулини мақомоти прокурорӣ дар “Соли маърифати ҳуқуқӣ” маҳсуб дониста шуд.
Роҳбарият ва аъзоёни Шӯро оид ба иҷрои саривақтии корҳои тарбиявӣ, ки самти муҳимтарини фаъолияти ҳайати шахсӣ маҳсуб меёбад маъруза намуда, бо назардошти баррасии масъалаҳои ҳалталаб дастур доданд, ки ҷиҳати беҳдошти вазъи ҳуқуқӣ ва баланд бардоштани сатҳи маърифатнокии ҳайати шахсӣ ба амалигардии нақша-барномаҳои ҳарбӣ таваҷҷӯҳи махсус зоҳир карда шавад.
Ҳамин тавр, баромадкунандагон аз машғулиятҳои рӯзмарраи сарбозон дар қисмҳои ҳарбӣ ёдовар шуда, таъкид карданд, ки дар ҳоли ҷаҳонишавию бархурди тамаддунҳо набзи ҷомеаи ҷаҳонӣ мураккаб арзёбӣ мешавад. Аз ин хотир, зарур аст, ки зимни ташкилу гузаронидани дарсҳои сиёсӣ-тарбиявӣ оид ба болоравии сатҳи донишу малака, маънавиёту маърифатнокӣ ва ҷаҳонбинию зиракии сиёсии сарбозон таваҷҷӯҳи хоса зоҳир намоем.
Боқӣ ШАРИФӢ
