Аз аввали моҳи январи соли равон дар Қувваҳои Мусаллаҳи Ҷумҳурии Тоҷикистон даври омӯзишӣ ҷараён дошта, бештари барномаҳои таълимиро нақша-чорабиниҳои тайёрии ҷангӣ дар бар мегирад. Вобаста ба ин, дар машқгоҳи ҳарбии “Фахробод”-и вилояти Хатлон, бо мақсади тақвият бахшидани маҳорату малакаи касбӣ ва сайқали таҷрибаи ҳайати шахсӣ, бо ҷалби хизматчиёни ҳарбии сатҳу зинаҳои гуногуни Артиши миллӣ дарсу машғулиятҳои мухталифи амалии саҳроӣ ташкилу ба роҳ монда шуданд.
Мавриди зикр аст, ки ҳамасола дар доираи оғози давраҳои омӯзишӣ дар Қувваҳои Мусаллаҳ ва мутобиқи Нақшаи маҷмӯи ягонаи Вазорати мудофиа бо ҷалби ҳайатҳои роҳбариву фармондеҳии сатҳу зинаҳои гуногуни ин ниҳоди қудратӣ ҷамъомад ё худ машғулиятҳои методӣ-таълимӣ ташкилу ба роҳ монда мешаванд.
Бояд қайд кард, ки ҳадафи баргузории ҷамъомади методӣ-таълимӣ ин пеш аз ҳама зимни пешбурди вазифаҳои хизматӣ дар амал нишон додани роҳу усулҳои нави омӯзишӣ дар Қувваҳои Мусаллаҳ, сайқали донишу малака, табодули таҷрибаомӯзӣ аз ҳамдигар ва баланд бардоштани масъулияти иштирокчиёни онро дар замони осоишта ва ҳолати ҷанг дар бар мегирифт.
Яъне, мароми асосӣ ин ташаккул додани назару муносибати ягона ба масоили омодагии ҷангӣ, ташкили хидмати дохилии қӯшунҳо, мувофиқ намудани ҳудуди тамоми шаҳракҳои ҳарбӣ, толору майдончаҳои варзишӣ ва дигар мавзеъу нуқтаҳои таълимии афсарону сарбозон ба талаботи ойинномаҳои ҳарбии Қувваҳои Мусаллаҳ ва мутобиқ ба пешравиҳои ҷомеаи муосир мебошад.
Аз ин хотир, дар чунин ҷамъомаду машғулиятҳои назариявию амалии саҳроӣ, роҳу усулҳои омодагии сафарбарӣ ва марҳилаҳои тайёрӣ ба он, тарзи идора намудани ҷузъу том дар маҳалли амалиёт, мутобиқ намудани вазъи рӯҳию равонии ҷанговарон ҳангоми набард, омӯзишу аз бар намудани мавзеъу минтақаи ҷуғрофӣ, тартиби бурдани хизмати қаровулӣ, ҷобаҷогузории наряди шабонарӯзӣ, роҳандозӣ намудани тадбирҳои муҳим дар самти ҳимояи шаҳрчаҳои ҳарбӣ ва дигар мавзуоти марбут, ки ба сатҳи омодагии ҳамаҷонибаи низомиён мусоидат мекунад, мавриди омӯзиш қарор дода мешавад.
Иштирокчиёни машғулиятҳои методӣ-таълимӣ давоми рӯз дар машқгоҳи ҳарбии Фахробод ба дарсҳои тайёрии амалиётӣ ва ҷамъиятӣ-давлатӣ фаро гирифта шуданд. Баҳри сайқали донишу малака ва маҳорати касбӣ онҳо аз фанҳои мухталифи низомӣ ва тарбияи ҷисмонӣ санҷиш супориданд.
Илова бар ин, қобилияти иштирокчиёни ҷамъомади методӣ-таълимӣ, бо истифода аз силоҳу муҳиммоти ҷангӣ ва аз рӯйи тирпарронӣ мавриди баҳогузорӣ қарор дода шуд.
Бо ҳамин тартиб, машғулиятҳои методӣ-таълимӣ дар толори яке аз қисмҳои низомии тобеи Ситоди генералии Қувваҳои Мусаллаҳ ҷамъбасту натиҷагирӣ карда шуд. Зимни суханронӣ муовинони вазири мудофиа ва масъулини Ситоди генералии Қувваҳои Мусаллаҳ, нахуст доир ба дастуру супоришҳои Сарфармондеҳи Олии Қувваҳои Мусаллаҳ, мӯҳтарам Эмомалӣ Раҳмон ва оид ба ғамхориҳои пайвастаи Роҳбарияти олии мамлакат нисбат ба низомиён ибрози назар
карда, фаъолияти фармондеҳон ва командирони сатҳу зинаҳои гуногуни қисмҳои низомии Вазорати мудофиаро дар самти ҳолати омодабошии ҷангӣ, сатҳи ташкилу баргузории машғулиятҳои ҳарбиву ҷисмонӣ, тақвият бахшидани пойгоҳҳои моддӣ-техникӣ, вазъи қонунияту тартиботи ҳуқуқӣ, интизоми ҳарбӣ, таъминоти ақибгоҳӣ, самаранок истифода намудани соатҳои дарсӣ ва дигар паҳлӯҳои пешбурди хизматро дар Артиши миллӣ мавриди таҳлилу баррасии ҳамаҷониба қарор доданд. Дар робита ба ислоҳи камбудиҳо ва баҳри беҳтар намудани фаъолияти рӯзмарраи хизмативу майишии афсарону сарбозони ҷузъу том ба 
масъулини дахлдор супоришҳои мушаххас доданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
