Аз соли 1996 инҷониб дар тобеияти Вазорати мудофиаи Ҷумҳурии Тоҷикистон Шӯрои занон амал менамояд, ки ин ташкилоти ҷамъиятӣ дар самти баланд бардоштани маърифати сиёсию ҳуқуқии занон, ташвиқи фарҳанги миллӣ, пешгирӣ аз сатҳи содиршавии ҷинояткорӣ ва дигар масъалаҳои муҳиму рӯзмараро, ки ба фаъолият ва бурду бохти занон-хизматчиёни ҳарбии Артиши миллӣ вобастагӣ дорад, дар амал татбиқ менамояд.
Дар ҷаласаи навбатии Шӯрои занон, ки он дар Шифохонаи ҳарбии Вазорати мудофиаи мамлакат доир гашт, намояндагони Агентии хизмати давлатии назди Президенти Ҷумҳурии Тоҷикистон, кормандони Вазорати мудофиа, Вазорати корҳои дохилӣ, Кумитаи кор бо занон ва оилаи назди Ҳукумати Ҷумҳурии Тоҷикистон ва Кумитаи дин, танзими анъана ва ҷашну маросим дар он иштирок ва суханронӣ намуданд.
Иштирокчиёни ҷаласа ҳар яке зимни баромади хеш, бо изҳори сипосу хушнуди қайд намуданд, ки дар сиёсати иҷтимоии давлату Ҳукумати Тоҷикистон ба масъалаи баланд бардоштани мақому манзалати занону бонувон дар ҳаёти ҷомеа диққати ҷиддӣ дода мешавад.
Дар зарфи беш аз сӣ соли Истиқлоли давлатӣ, ҳукумати кишвар алалхусус сарвари ғамхори тоҷикон, Пешвои миллат, муҳтарам Эмомалӣ Раҳмон занону бонувони мамлакатро ҳамаҷониба дастгирӣ мекунанд ва барои беҳдошти вазъи иҷтимоиву иқтисодӣ ва зисту зиндагонии шоистаи онҳо дар мамлакат, тамоми татбирҳои заруриро роҳандозӣ менамоянд.
Ин аст, ки имрӯз ягон самти фаъолиятро, бидуни ширкати фаъоли занон тасаввур кардан ғайриимкон аст. Занону бонувон ва модарони тоҷик айни ҳол на танҳо дар сафи Қувваҳои Мусаллаҳ хизмати софдилонаву содиқона менамоянд, балки онҳо дар тамоми бахшу соҳаҳои давлати соҳибистиқлоламон кору фаъолияти назаррас намуда, мақоми хосаро соҳиб гардидаанд. Дар ин замина, дар ҷаласа инчунин қайд карда шуд, ки имрӯз саҳми занону бонувони тоҷик дар сафҳои Артиши миллӣ, бахшҳои илму маориф, фарҳангу тандурустӣ ва дигар соҳаҳои ҳаётан муҳими иҷтимоиву иқтисодии кишвар бағоят бузург аст.
Дар идомаи ҷаласа вобаста ба вазъи пуртазод ва зудтағйирёбандаи ҷаҳони муосир, таъкид карда шуд, ки дар чунин шароити пешгӯинашаванда, ҳар яки моро зарур аст, ки дар самти пешгирӣ намудани омилҳои номатлуб дар байни ҷавондухтарон ва занон, ноболиғон, худкушиву худсӯзӣ, мубориза бар зиди терроризму экстремизм ва шомилшавии онҳо ба ҳизбу ҳаракатҳои тундгаро, ҳолатҳои зӯроварӣ дар оила, ташвиқи фарҳанги миллӣ, татбиқи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи танзими анъана ва ҷашну маросим дар Ҷумҳурии Тоҷикистон» ва баҳри боз ҳам баланд бардоштани маърифати сиёсию ҳуқуқии занон, беш аз ҳарвақта пешсафу фаъолтар бошанд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
