Дар толори асосии Вазорати мудофиаи Ҷумҳурии Тоҷикистон тањҳти роҳбарии муовини Сарвазири Ҷумҳурии Тоҷикистон Дилрабо Мансурӣ, иштироки вазири мудофиаи Ҷумҳурии Тоҷикистон, генерал–полковник Собирзода Эмомалӣ, муовини Прокурори генералӣ–сарпрокурори ҳарбии Ҷумҳурии Тоҷикистон, генерал–лейтенанти адлия Ҳаётзода Фирдавс, комиссарони ҳарбӣ, роҳбарияти мақомоти иҷроияи маҳаллии ҳокимияти давлатии шаҳру ноҳияҳо ва дигар сохторҳои марбутаи соҳавӣ «Ҷаласаи навбатии комисияи даъвати ҷумҳуриявӣ оид ба омодагӣ ба даъвати тирамоҳии соли 2025 ба хизмати ҳарбӣ» баргузор шуд.
Зимни ҷаласа нахуст ба ҳозирин дастуру супоришҳои Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳи кишвар муҳтарам Эмомалӣ Раҳмон ҷиҳати дар муҳлати муайян ва бо сифати баланд таъмин намудани нақшаи даъвати тирамоҳии ҷавонон ба хизмати ҳатмии ҳарбӣ расонида шуд.
Таъкид гардид, ки ҷиҳати иҷрои Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007 — и Ҷумҳурии Тоҷикистон ба хизмати ҳарбӣ” дар ҳама шаҳру ноҳияҳои мамлакат тадбирҳои зарурӣ андешида шуда, ин маъракаи муҳими сиёсӣ дар сатҳи баланд ташкил ва роҳандозӣ гардад, зеро хизмат ба Ватан вазифаи муқаддаси ҳар як шаҳрванди Тоҷикистони соҳибистиқлол ба шумор меравад.
Қайд карда шуд, ки имрӯзҳо бо дастгирии Ҳукумати Ҷумҳурии Тоҷикистон баробари беҳтар гардидани шароити маишии афсарону сарбозон, ҳамзамон дар қисмҳои ҳарбии ҳама сохторҳои низомии кишвар шароити хуби будубош ва адои хизмат фароҳам оварда шудааст.
Аз ин лиҳоз ҳар як ҷавони худогоҳу хештаншинос ва поквиҷдону боиродаро зарур аст, ки вазифаи аввалиндараҷаи хеш, хизмат ба Ватанро ҳамчун вазифаи шаҳрвандиву инсонии худ дониста, ин рисолати бузурги ҷавонмардиро бо масъулияти баланд иҷро намояд.
Бо назардошти ин ва вазъи пешгӯиинашавандаи ҷомеаи имрӯза ҳар як шаҳрванди кишварро зарур меояд, ки ба қадри дастовардҳои даврони соњибистиқлолии Ватани азизамон расад, зеро дар ҳама давру замон, махсусан дар шароити имрӯза таъмини амният, суботи сиёсӣ, ҳифзи арзишҳои милливу давлатӣ вазифаи муқаддас ва пуршараф аст.
Дар рӯҳияи ватандӯстиву хештаншиносӣ тарбия намудани ҷавонон, пешгирӣ аз ҳолатҳои қонуншиканиву кирдорҳои коррупсионӣ, инчунин муносибати дуруст бо аҳолӣ, ҷоннок намудани корҳои фаҳмондадиҳӣ дар байни мардум, санҷиши дақиқ ва муоинаи дурусти тиббӣ, амалӣ намудани муқаррароти моддаи 34–и Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» аз масъалаҳои дигар ва муҳими ҷаласа буданд, ки мавриди баррасии ҳамаҷониба қарор дода шуданд.
Маркази матбуот ва иттилооти
Вазорати мудофиаи Ҷумҳурии Тоҷикистон
