Дар Вазорати мудофиа таҳри роҳбарии Котиби Шурои амнияти Ҷумҳурии Тоҷикистон Юсуф Раҳмон “Ҷаласаи корӣ бо роҳбарони мақомоти марказии иҷроияи ҳокимияти давлатии Ҷумҳурии Тоҷикистон” баргузор шуд.
Дар ин ҷаласа вазири мудофиа, вазири корҳои дохилӣ, прокурори генералӣ, раиси Қумитаи ҳолатҳои фавқулода ва мудофиаи гражданӣ, роҳбарияти Кумитаи давлатии амнияти миллӣ, роҳбарияти Вазорати адлия, фармондеҳони Гвардияи миллӣ ва Қӯшунҳои сарҳадӣ, директорони Агентиҳои назорати давлатии молиявӣ ва мубориза бо коррупсия, Агентии назорати маводи нашъаовар, Агентии таъминоти амволи махсус ва роҳбарияти як қатор сохторҳои марбутаи соҳавӣ иштирок доштанд.
Роҳбарони мақомоти марказии иҷроияи ҳокимияти давлатии Ҷумҳурии Тоҷикистон зимни ҷаласаи мазкур вобаста ба иҷрои дастуру супоришҳои Президенти Ҷумҳурии Тоҷикистон, сарфармондеҳи Олии Қувваҳои мусаллаҳи кишвар, генерали Артиш муҳтарам Эмомалӣ Раҳмон ҷиҳати дар шароити ҷаҳонишавӣ ҳифзи амнияту суботи кишвар, пурзур намудани иқтидори мудофиавии давлат ва баланд бардоштани ҳисси ватандӯстии шаҳрвандон чор мавзуъро мавриди таҳлилу баррасии ҳамаҷониба қарор доданд.
Нахуст доир ба мавзуи рушди саноати мудофиавӣ вазири саноат ва технологияҳои нави Ҷумҳурии Тоҷикистон баромад намуда, вобаста ба ҳолати кунунӣ ва фаъолияти минбаъдаи корхонаҳои саноатии соҳа маълумот пешниҳод намуд.
Ҳамзамон саҳми корхонаҳои саноатии соҳа дар татбиқи ҳадафи чоруми миллӣ – Саноатикунонии босуръати кишвар муҳим арзёбӣ шуд.
Дар идомаи ҷаласа аз ҷониби муовини вазири мудофиа оид ба аслиҳа ва техникаи ҷангӣ доир ба фаъолияти имрӯзаи корхонаҳои саноатии Вазорати мудофиа, бо ҷалби соҳибкорони ватанӣ таъсис додани корхонаҳои нави истеҳсолии соҳавӣ ва дигар роҳҳои рушди он ҳисобот дода шуд.
Таъмини мудофиаи давлат дар шароити таҳдиду хатарҳои эҳтимолии замони имрӯза, густариши мудофиаи ҳудудӣ, санҷиши ҳолати захираҳои сафарбарӣ, саҳми шаҳрвандони дар эҳтиёт қарордошта дар самти ҳифзи марзу буми кишвар, боз ҳам густариш бахшидани фаъолияти сохторҳои қудратӣ ва дигар масъалаҳои марбут ба ҳифзу таъмини амнияту суботи сартосарӣ дар баромади Сардори ситоди генералӣ, муовини аввали вазири мудофиа шарҳи бештар ёфт.
Қайд карда шуд, ки бо ҷалби шахсони масъули Вазорати мудофиаи Ҷумҳурии Тоҷикистон қариб дар тамоми шаҳру ноҳияҳои кишвар чорабиниҳои сиёсӣ – ҷамъиятии санҷиши мудофиаи ҳудудӣ ва захираҳои сафарбарӣ ташкилу баргузор карда шуданд, ки дар онҳо сокинон бо рӯҳияи баланд ва масъулияти бузург ширкат намуданд.
Намояндагони котиботи Шурои амнияти Ҷумҳурии Тоҷикистон дар баромади худ вобаста ба беҳтар намудани шароити хизмати сарбозону афсарон, даъвати шаҳрвандон ба хизмати ҳатмии ҳарбӣ, омодабошии баланди ҷангӣ, ҳифзи саломатии сарбозону афсарон, ҷалби шаҳрвандони солиму ватандӯст ба хизмати ҳатмии ҳарбӣ, пешгирии ҳолатҳои қонуншиканӣ, коррупсионӣ, ҷалби табибони баландихтисос ба соҳаи низомӣ ва дигар масъалаҳои муҳими соҳаро таҳлил намуданд.
Ҷаласаи мазкур бо таклифу пешниҳодҳои муфид баҳри боз ҳам тақвият бахшидани ҳамкориҳои зичи сохторҳои қудратии кишвар ва дар якҷоягӣ ҳифзу ҳимояи манфиатҳои миллӣ, оромиву суботи кишвар ва саҳм гузоштан дар рушду пешрафти Тоҷикистони соҳибистиқлол ҷамъбаст гардид.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
