Аз якуми апрели соли равон, дар мамлакат даъвати навбатии шаҳрвандони солҳои таваллуди 1994 ва 2003-юми Ҷумҳурии Тоҷикистон ба хизмати ҳатмии ҳарбӣ оғоз мегардад. Баҳри дар сатҳи баланд ташкилу ба роҳ мондани даъвату гусели ҷавонписарон ба сафи Қувваҳои Мусаллаҳи ҷумҳурӣ ва қабулу ҷобаҷокунии онҳо дар қисму воҳидҳои низомӣ, ҳафтаи равон як қатор ҷамъомаду чорабиниҳои муҳими сиёсии пеш аз даъватӣ баргузор гардиданд. 
Дар доираи омодагӣ ба чорабиниҳои пеш аз даъватӣ, дар “Кохи афсарон”-и Вазорати мудофиа ҷаласаи комиссияи даъватии ҷумҳуриявӣ баргузор гардид, ки дар он таҳлил ва ҷамъбасти даъвати тирамоҳии соли 2020 ва вазифаҳо барои даъвати баҳории соли 2021-ум мавриди баррасӣ қарор гирифт.
Вобаста ба масъалаи мазкур, нахуст талаботи фармони Президенти Ҷумҳурии Тоҷикистон муҳтарам Эмомалӣ Раҳмон “Дар бораи ба эҳтиёт рухсат додани хизматчиёни
ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1994-2003-юми
Ҷумҳурии Тоҷикистон” ба хизмати ҳарбӣ ба саҳми иштирокчиён расонида шуд.
Дар ҷаласаи мазкур, муовини сарвазири мамлакат-раиси комиссияи даъватии ҷумҳуриявӣ-Матлубахон Сатториён, сардори Ситоди генералии Қувваҳои Мусаллаҳ, генерал-лейтенант Эмомалӣ Собирзода, сардорони раёсатҳои дахлдори Вазорати мудофиа, роҳбарону намояндагони сохторҳои қудративу мақомоти ҳифзи ҳуқуқ, раисони комиссияҳои даъватӣ, комиссарони ҳарбии шаҳру ноҳияҳои ҷумҳурӣ ва дигар шахсони масъул ширкат намуданд.
Дар ҷаласа бо қаноатмандӣ зикр карда шуд, ки дар даъвати тирамоҳии соли 2020-ум, масъулини мақомоти вобастаи давлатии бисёре аз шаҳру ноҳияҳои ҷумҳурӣ фаъолияти назаррас нишон дода, ин чорабинии муҳими сиёсиро пеш аз муҳлат, яъне 6-уми ноябр пурра ба анҷом расониданд. Дар ин самт, саҳми масъулини мақомоти иҷроияи ҳокимияти давлатии шаҳру ноҳияҳои мамлакат ва иқдому ташаббусҳои волидони ҷавонписарон, ки фарзандони хешро ихтиёрӣ ба комиссияҳои даъватӣ ҳозир намуданд, шоистаи таҳсин мебошад.
Дар баробари баррасӣ ва муҳокимаи масъалаҳо, ҳамзамон дар ҷаласа оид ба омодагии ҳамаҷониба ба даъвати баҳории шаҳрвандон ба хизмати ҳарбӣ, бартараф намудани камбудиву норасоиҳои соҳавӣ, бурдани корҳои фаҳмондадиҳӣ доир ба талаботи тарҳи нави қонунуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ”, тайёр намудани мутахассисони хурди низомӣ барои Қувваҳои Мусаллаҳ дар Ташкилоти ҷамъиятии мадагори мудофиаи ҷумҳурӣ, муташаккилона ва дар сатҳи зарурӣ ташкилу ба роҳ мондани тамоми чорабиниҳо вобаста ба сифати даъвати баҳории шаҳрвандон ба хизмати ҳарбӣ, масъулини дахлдор бо супоришҳои мушаххас вазифадор карда шуданд.
Фаридун МАҲМАДАЛИЗОДА,
сардори Маркази матбуот,
полковник
