12 июн дар толори асосии Вазорати мудофиа таҳти роҳбарии раиси комиссияи даъвати ҷумҳуриявӣ, муовини Сарвазири Ҷумҳурии Тоҷикистон Дилрабо Мансурӣ ҷаласаи комиссияи даъвати ҷумҳуриявӣ оид ба ҷамъбасти даъвати баҳории шаҳрвандон ба сафи Қувваҳои Мусаллаҳи кишвар баргузор шуд.
Дар ин ҷаласа вазири мудофиаи кишвар генерал–полковник Собирзода Эмомалӣ, муовини Прокурори генералӣ–сарпрокурори ҳарбӣ генерал–лейтенанти адлия Ҳаётзода Фирдавс, муовинони вазири мудофиа, намояндагони Шурои амнияти Ҷумҳурии Тоҷикистон, сохторҳои низомӣ, вазорату идораҳои дахлдор, комиссарон ва роҳбарияти як қатор шаҳру ноҳияҳои ҷумҳурӣ иштирок доштанд.
Баъди ифтитоҳи ҷаласа, нахуст вазири мудофиаи кишвар баромад намуда, ёдовар шуд, ки маҳз бо таваҷҷуҳ ва дастгириҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва андешидани чораҳои зарурӣ нақшаи даъвати баҳории шаҳрвандон ба сафи Артиши миллӣ пеш аз муҳлат бо сифати баланд иҷро гардид.
Ҳамзамон таъкид шуд, ки бо дастгириҳои Ҳукумати Ҷумҳурии Тоҷикистон ва масъулиятшиносии роҳбарияти сохторҳои низомӣ, имрӯз дар ҳама қисму воҳидҳои ҳарбӣ шароити мусоиди кору хизмат фароҳам буда, иқтидори мудофиавии давлат устувор гардидааст.
Саривақт иҷро гардидани «Фармони Президенти Ҷумҳурии Тоҷикистон дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1999-2008 – и Ҷумҳурии Тоҷикистон ба хизмати ҳарбӣ» гувоҳи равшани он аст, ки дар заминаи ҳисси баланди ватандӯстии шаҳрвандон ҷавонони бо нангу номус хизмат дар сафҳои Қувваҳои Мусаллаҳро қарзи шаҳрвандӣ ва рисолати ҷавонмардии хеш медонанд.
Баргузории чорабиниҳои гуногуни ҳарбӣ–ватандӯстӣ, таблиғотиву ташвиқотӣ, суҳбату вохӯриҳои судманд бо аҳолӣ, омӯзиши амиқи шаҳрвандони сину соли даъватӣ, вазъи саломатии онҳо, ҳамкории зичи мақомоти иҷроияи маҳалии ҳокимияти давлатии шаҳру ноҳияҳои кишвар бо Муассисаи давлатии “Мададгори мудофиа”-и Вазорати мудофиа ва хуб ба роҳ мондани дигар корҳои муҳим дар ин самт, омилҳои асосии босифат ва саривақтӣ иҷро гардидани нақшаи даъвати баҳорӣ ва тирамоҳии ҷавонон ба хизмати ҳатмии ҳарбӣ арзёбӣ шуд.
Дар идома муовини прокурори генералӣ, сарпрокурори ҳарбӣ таваҷҷуҳи ҳозиринро ба масъалаҳои муҳими соҳа, аз ҷумла риояи низоми ягонаи ҳарбӣ, интизоми ҳарбӣ, боз ҳам бештар намудани фазои дӯстиву рафоқат дар миёни сарбозону афсарон, иҷрои ҳатмии талаботи оинномавӣ, муносибатҳои байниҳамдигарӣ, баланд бардоштани малакаи касбӣ ва ҷангии сарбозону афсарон дар қисмҳои низомӣ ҷалб намуд.
Иброз гардид, ки маҳз бо талошу дастгириҳои рӯзафзуни Пешвои миллат муҳтарам Эмомалӣ Раҳмон имрӯз дар кишвари азизамон сулҳу суботи комил пойдор аст ва ҳифзу ҳимояи ин дастоварди беназири давлату миллат, пеш аз ҳама вазифаи муқаддаси ҳар як хизматчии низомӣ ба шумор меравад.
Аз ин хотир ҳар яки моро зарур аст, ки фаъолияти худро дар доираи қонунҳои амалкунанда ва санадҳои меъёрӣ–ҳуқуқӣ ба роҳ монда, бо масъулияти баланди шаҳрвандӣ бар Ватани азизамон содиқонаву софдилона хизмат намоем.
Баъди таҳлилу баррасии ҳамаҷониба раиси комиссияи даъвати ҷумҳуриявӣ, муовини Сарвазири Ҷумҳурии Тоҷикистон Дилрабо Мансурӣ ба консепсияи корҳои сиёсӣ–тарбиявӣ ва фаъолияти командирони қисмҳои ҳарбии ҳама сохторҳои низомӣ таваҷҷуҳи махсус зоҳир намуда, дар рӯҳияи ватандӯстӣ, меҳанпарастӣ, эҳтироми якдигар, ҷасуру далер, қавиирода, ҳамчун мутахассисони арзандаи соҳа ва ҳимоятгари воқеии Ватану миллат тарбия намудани ҷавононро дар ҳама давру замон, махсусан шароити имрӯза муҳим арзёбӣ намуд.
Бо назардошти дастгириҳои ҳамаҷониба аз тарафи Ҳукумати Ҷумҳурии Тоҷикистон ба масъулин дастур дода шуд, ки сарбозону афсаронро ҷисману рӯҳан мустаҳкам намуда, баҳри пешгирӣ аз ҷинояту ҷинояткорӣ, ислоҳи камбудиҳои ҷойдошта, риояи тартиби рӯз дар қисмҳои низомӣ, истифодаи технологияи ҳозиразамон дар фаъолияти рӯзмарра, омӯзиши таҷрибаи давлатҳои пешрафта, зиёд намудани корҳои фаҳмондадиҳӣ дар миёни сарбозону афсарон, ба хизмати ҳарбӣ ҷалб намудани ҷавонони ҷисману рӯҳан солим тадбирҳои муҳим андешида, ҷиҳати босифат иҷро намудани даъвати тирамоҳии шаҳрвандон ба сафи Артиши миллӣ омодагии ҷиддӣ бинанд.
Бояд қайд намуд, ки хизматчиёни низомии Қувваҳои Мусаллаҳ ба савганди ҳарбии худ ҳамеша содиқ монда, тамоми донишу таҷриба ва малакаи касбияшонро дар роҳи ҳифзу ҳимояи манфиатҳои милливу давлатӣ сафарбар менамоянд.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
