Ҷаласаи комиссияи даъватии ҷумҳуриявӣ дар доираи омодагӣ ба чорабиниҳои пешаздаъватӣ доир гардида, зимни он нахуст фармони Президенти Ҷумҳурии Тоҷикистон мўҳтарам Эмомалӣ Раҳмон “Дар бораи ба эҳтиёт рухсат додани хизматчиёни ҳарбие, ки муҳлати муайяншудаи хизматро дар сафи Қувваҳои Мусаллаҳ ба анҷом расонидаанд ва даъвати навбатии шаҳрвандони солҳои таваллуди 1994-2003-и Ҷумҳурии Тоҷикистон ба хизмати ҳарбӣ”, мавриди баррасӣ ва натиҷагирӣ қарор дода шуд.
Дар ҷаласаи мазкур муовини сарвазири мамлакат-раиси комиссияи даъватии ҷумҳуриявӣ Матлубахон Сатториён, сардори Ситоди генералии Қувваҳои Мусаллаҳ, сардорони раёсату хадамотҳои дахлдори Вазорати мудофиа ва Ситоди генералӣ, роҳбарону намояндагони сохторҳои қудративу мақомоти ҳифзи ҳуқуқ, раисони комиссияҳои даъватӣ, комиссарони ҳарбии шаҳру ноҳияҳои ҷумҳурӣ ва дигар шахсони масъул ширкат намуданд. Иштирокчиён зимни баромади хеш бо натиҷагирӣ аз даъвати баҳории шаҳрвандон, ки чун ҳар вақта пеш аз мўҳлат иҷро гардидааст, фаъолияти комиссияҳои даъватии шаҳру ноҳияҳои кишварро дар самти иҷрои вазифаҳои бар зима дошта самарабахш арзёбӣ намуданд. Ва вобаста ба дастуру супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон генерали артиш, мўҳтарам Эмомалӣ Раҳмон таъкид карданд, ки дар даъвати тирамоҳии шаҳрвандон низ бо риояи дақиқи талаботи қонунгузорӣ дар соҳаи даъват, аз ҷумла Қонуни Ҷумҳурии Тоҷикистон “Дар бораи ўҳдадории ҳарбӣ ва хизматӣ ҳарбӣ” дар таҳрири нав, фаъолияти комиссияҳои даъватӣ ба таври зарурӣ роҳандозӣ карда шуда, ин чорабинии муҳими сиёсӣ бо сифати баланд ва пеш аз муҳлат иҷро карда шавад. 
Дар ҷаласа масъулин бо қаноатмандӣ иқдому ташаббусҳои волидони даъватшавандагон, ки ҷавонписарони худро ихтиёрӣ ба комиссияҳои даъватӣ ҳозир намудаанд, натанҳо шоистаи таҳсин арзёбӣ карданд, балки барои чунин масъулиятшиносӣ ва дарки муҳимияти хизмати ватан ба ҳар як фарди худогоҳу хештаншиноси ҷомеа изҳори сипос баён намуданд.
Ҳамин тавр, дар баробари баррасӣ ва муҳокимаи масъалаҳо ҳамзамон дар ҷаласа оид ба омодагии ҳамаҷониба ба даъвати тирамоҳии шаҳрвандон ба хизмати ҳарбӣ, бартараф намудани камбудиву норасогиҳои соҳавӣ, бурдани корҳои фаҳмондадиҳӣ доир ба талаботи тарҳи нави Қонуни Ҷумҳурии Тоҷикистон “Дар бораи ўҳдадории ҳарбӣ ва хизмати ҳарбӣ”, тайёр намудани мутахасисони хурди низомӣ барои Қувваҳои Мусаллаҳ дар Ташкилоти ҷамъиятии мададгори мудофиаи ҷумҳурӣ, муташаккилона ва дар сатҳи зарурӣ ташкилу ба роҳ мондани тамоми чорабиниҳо вобаста ба сифати даъвати тирамоҳии шаҳрвандон ба хизмати ҳарбӣ масъулини дахлдор бо супоришҳои мушаххас вазифадор гардиданд.
Боқӣ Шарифзода
