Ҷаласаи навбатӣ ва ҷамъомади таълимӣ, ки бо ҷалби комиссарони ҳарбии вилоятҳо ва шаҳру ноҳияҳои ҷумҳурӣ баргузор гардид, дар он пеш аз ҳама, дар доираи қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” иҷрои талаботи фармони Президенти Ҷумҳурии Тоҷикистон муҳтарам Эмомалӣ Раҳмон дар бораи даъвату гусели шаҳрвандон ба сафи Қувваҳои Мусаллаҳро дар бар мегирифт.
Сардори Ситоди генералии Қувваҳои Мусаллаҳ, генерал-лейтенатн Э. Собирзода дар самти омодагии масъулин вобаста ба чорабиниҳои даъватӣ, монеаву мушкилоти ҷойдошта дар ин ҷода, бартараф намудани камбудиҳои ошкоргардида ва оид ба дигар корҳои анҷомёфта маърӯза карда, изҳор дошт, ки аз ҷониби комиссариатҳои ҳарбии вилоятҳо ва шаҳру ноҳияҳои ҷумҳурӣ дар ҳамкорӣ, бо мақомоти масъули вобастаи давлатии даъват, то санаи 19-уми марти соли равон шумораи ҷавонписароне, ки дар даъвати баҳорӣ бояд ба сафи ҷузъу томи Артиши миллӣ шомил карда шаванд, аллакай муайян ва мушаххас карда шудааст. Ҳамзамон, масъулини дахлдори Ситоди генералӣ оид ба омӯзишу аниқнамоии захираҳои сафарбарӣ, муайян ва мушаххас намудани ҳайат ва теъдоди шаҳрвандон дар қайди комиссариатҳои ҳарбӣ, ташкили машғулиятҳои сафарбарӣ бо захираҳои эҳтиётӣ, таъмини онҳо бо лавозимоти зарурӣ, ҳамаҷониба ва амалан татбиқ намудану тақвият бахшидани мудофиаи ҳудудӣ ба вазири мудофиа гузориш доданд. ғ
Дар рафти ҷаласа доир ба дастуру супоришҳо ва талаби қотеонаи Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон, роҳбарияти Вазорати мудофиа сухан гуфта, таъкид намуд, ки вазъи ноустувору зудтағйирёбандаи ҷаҳони муосир, имрӯз аз ҳар як хизматчии ҳарбӣ омодабошии доимии ҷангӣ, ҳушёриву зиракӣ ва масъулияти баланду муносибати ҷиддиро дар самти иҷрои вазифаву уҳдадориҳои хизматӣ тақозо менамояд. Зеро, тақвият бахшидани тамоми самту соҳаҳои Қувваҳои Мусаллаҳ, ба баланд гардидани иқтидори мудофиавии кишвар таъсири бевосита мерасонад. ӯ
Аз ин рӯ, қатъӣ супориш дода шуд, ки масъулини ин чорабинии муҳими сиёсӣ, пеш аз ҳама, ҳамкориро бо мардум боз ҳам ҷоннок намуда, ба масоили ташкилу ба роҳ мондани сифати даъват диққати аввалиндараҷа равона намоянд ва дар ҳамоҳангӣ бо мақомоти иҷроияи ҳокимияти давлатии шаҳру ноҳияҳо, тамоми шароити заруриро барои ҳайати комиссияи даъватӣ муҳайё созанд.
Илова бар ин, дастур дода шуд, ки дар комиссариатҳои ҳарбӣ утоқҳои махсуси қабули шаҳрвандон доимо фаъол гардонида шуда, вобаста ба муроҷиати мардум дар доираи талаботи қонунҳои амалкунанда, сари вақт қарори дахлдор қабул карда шавад.
Зимни оғоз ва ҷараёни мавсими даъвати навбатӣ, ба омӯзиши шахсияти даъватшавандагон, ташхису муоинаи тиббӣ, ҷалби ҳарчи бештари фарзандони шахсони мансабдор, пешгирӣ аз роҳҳои ғайриқонунии даъват, риояи дурусти пӯшидани сару либоси низомӣ ва ба масоили муомилаву муносибати хуб бо шаҳрвандон диққати ҷиддӣ зоҳир намуда, кӯшиш намоянд, ки ҷавонони солиму бардам ва болаёқатро интихоб ва ба сафи Қувваҳои Мусаллаҳ равона созанд.
Дар идомаи ҷаласа, инчунин ба масъулини раёсату шуъбаҳои Дастгоҳи марказии Вазорати мудофиа, Ситоди генералӣ ва фармондеҳони навъи Қувваҳои Мусаллаҳи ҷумҳурӣ дастур дода шуд, ки масъалаи қабулу ҷобаҷокунии наваскарон дар қисмҳои низомӣ, ба онҳо вобаста намудани афсарону сержантони ботаҷриба, таҳия ва дар амал татбиқ намудани барномаҳои дарсӣ, ғамхорӣ зоҳир намудан ба сарбозони ҷавон ҳангоми адои хизмати ҳарбӣ ва пурра таъмин намудани навдаъватшудагонро бо тамоми шароити хизмативу майишӣ ва ҳам таълимӣ таҳти назорати доимӣ қарор диҳанд.
Фаридун МАҲМАДАЛИЗОДА,
сардори Маркази матбуот,
полковник
