—Ҷавонон бояд аз ҳама қишрҳои ҷомеа бештар фаъол бошанд, муқаддасоти миллӣ ва дастовардҳои истиқлолиятро ҳифз кунанд, дар ҳаёти сиёсиву иҷтимоии Тоҷикистони азиз бо нерӯи бунёдгарона ширкат варзанд ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд».
Эмомалӣ РАҲМОН
Ба ҳамагон маълум аст, ки терроризм ва ифротгароӣ — содир намудани амалҳои номатлубест, ки таҳдиди хатар ба ҳаёти инсонҳоро дорад.
Имрӯз фурсате ба миён омадааст, ки бояд ба муқобили ин зуҳуроти хатарзо ҳама сарҷамъона мубориза барем. Мусаллам аст, ки терроризм беш аз пеш хусусияти фаромиллӣ ва глобалӣ касб намуда, он дар минтақаҳои гуногуни ҷаҳон доман паҳн намудааст ва барои амнияти давлатҳои алоҳида ва минтақаҳо, воқеан, таҳдид эҷод менамояд.
Тавре медонем, Тоҷикистон ҷангӣ таҳмилии шаҳрвандиро аз сар гузаронидааст ва мардуми он бо зуҳуроти зишти ин падидаи ғайриинсонӣ аз наздик ошно мебошанд ва мардуми ин сарзамин дар ҳама ҳолат мекӯшанд то ин падидаи номатлуби аср решакан гардад. Аммо, сарфи назар аз тадбирҳои солҳои охир андешидашуда, дар бахши мубориза бо терроризм ва ифротгароӣ таҳдиди амалҳои нави ноҷавонмардона на фақат аз байн нарафтааст, балки афзоиш ёфтааст. Тавре ҳамагон огоҳ ҳастем, имрӯз дар гӯшаҳои гуногуни ҷаҳон фаъолшавии созмонҳои террористӣ ва ташкилоту созмонҳои маблағгузори онҳо ба мушоҳида мерасад.
Мояи ифтихор ва сарфарозист, ки ҷавонони тоҷик, аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қишри ояндасоз ва хазинаи тиллоии миллат дониста шудаанд. Аз амалҳои нек ва талошҳои пайвастаи ҷавонони худогоҳу хушинос бармеояд, ки онҳо аз ин падидаҳои номатлуби асри нав, худро дур гирифта, барои ворид нашудан ба гурӯҳои террористию ифротгароӣ нангу номуси миллии худро баланд бардошта, барои таъмини амнияти кишвар, пойдории ваҳдати миллӣ ва рушди босуботи Тоҷикистони соҳибистиқлол талош менамоянд.
Мусаллам аст, ки дар заминаи тарбияи дурусту дарки масъулияти баланд мардуми шарафманди Тоҷикистон метавонанд аввалан ба ҳадафҳои стратегии рушди кишвари азизамон ноил гарданд ва пасон суботу оромиро таъмин сохта, барои миллат шароити хуби зиндагиро фароҳам созанд. Албатта ин вазифаи муқаддас бояд кори ҳаррӯзаи оила, мактаб ва ниҳодҳои дахлдор бошад.
Ш. ШАРИФОВ
рӯзноманигор
