Ба андешаи муҳаққиқони соҳа матбуот ҳамчун як рукни муҳими сиёсӣ ва маънавии ҷомеа дар таҳкими асолати миллӣ, давлатдорӣ, худшиносии комил, ҷаҳонбинӣ ва завқи мардум, пойдории адолату воқеияти рӯзгор нақши муассир дорад. Имрӯзҳо ба назар мерасад, ки матбуоти даврӣ рисолати худро бобати расонидани иттилооти воқеӣ, ташаккули афкори созанда, тарбияи насли солиму хештаншинос адо намуда, дар таҳкими ҷомеаи мутамаддин ва пешрафти давлати соҳибистиқлоламон саҳми амиқ ва шоиста гузошта истодааст.
Имрӯз аз таъсисёбиии нашрияи Вазорати мудофиаи Ҷумҳурии Тоҷикистон, аввалин нашриёти низомӣ дар мамлакат, рӯзномаи ҳарбӣ-сиёсии кишвар-«Ҳомии Ватан» 31 сол пур шуд. Ҳанўз дар саҳифаи аввали нахустшумораи он Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали Артиш муҳтарам Эмомалӣ Раҳмон нашри ин рӯзномаро як падидаи нек арзёбӣ намуда буданд.
Рӯзномаи «Ҳомии Ватан», ки ҳамқадами Артиши миллист, аз замони таъсисёбӣ инҷониб тавонист, рисолати аслии худ, яъне инъикоси масоили ҳарбии мамлакатро ба таври назаррас иҷро намояд. Ин аст, ки ҳайати эҷодӣ ва кормандони рӯзнома пайваста кӯшиш ба харҷ медиҳанд, ки дар саҳифаҳои рӯзномаи мазкур бештар маводи ватандӯстонаву тарғибкунандаи хизмати ҳарбиро ба чоп расонанд.
Воқеан, рӯзномаи «Ҳомии Ватан» дар тӯли беш аз се даҳсолаи фаъолияти худ бо инъикоси саривақтии мавзуъҳо аз ҳаёт ва фаъолияти хизматчиёни ҳарбӣ, пеш аз ҳама сарбозони ҷасуру тавонои меҳан маҳбубияти хосае дар байни хонандагон ва аҳли илму адаби кишвар дорад. Аз ин рӯ, ҳайати эҷодии рӯзнома бо масъулияти баланд дар пайи эҷод ва нашри матолиби ҷолиб буда, пайваста кӯшиш менамоянд вазифаву уҳдадориҳои эҷодии худро сарбаландона иҷро намоянд ва бар ин васила дар таҳкими худшиносиву эҳсоси волои ватандӯстонаи хизматчиёни ҳарбии Қуввањои Мусаллаҳ саҳми арзанда гузоранд.
Шоири халқии Тоҷикистон Озарахш тавсифи рӯзномаи “Ҳомии Ватан”-ро хело зебо ва шоирона ба қалам додааст. Мавсуф ин рӯзномаи ҳарбиёнро дилсӯзи сухан ва ғамхори чаман унвон дода, нақши нигоштаҳои онро дар ҳифзи марзу бум ва баланд бардоштани ҳисси ифтихори афсарону сарбозон муҳим арзёбӣ кардааст.
Дилсӯзи сухан, сухан азизат дорад,
Ғамхори чаман, чаман азизат дорад.
Нақши қаламат ҳифзи диёру ёр аст,
«Ҳомии Ватан», Ватан азизат дорад!
Шоҳин ШАРИФОВ,
Сармутахассиси
Рӯзномаи “Ҳомии Ватан”
