Созандагиву бунёдкорӣ, сабзу хуррам гардонидани муҳити зист ва дар ин замина, ободу зебо гардонидани як гӯшаи диёр, яке аз амалҳои неки инсонӣ ба ҳисоб рафта, дар ин радиф, хизматчиёни ҳарбии сатҳу зинаҳои гуногуни Вазорати мудофиаи мамлакат ва ҳайати шахсии сохторҳои таркибии он, дар баробари баланд бардоштани иқтидори 
мудофиавии кишвар, инчунин дар самти тозаву озода нигоҳ доштани муҳити зист ва баҳри обдии ин диёри зебоманзар аз худ саҳми арзанда мегузоранд.
Дар доираи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба баланд бардоштани сатҳи некӯаҳволии ҷомеа, бунёди боғу токзорҳо ва ба гардиши кишоварзӣ даровардани заминҳои тӯли солҳо бекорхобида, ҳафтаи равон бо иштироки ҳайати роҳбариву фармондеҳии Вазорати мудофиаи кишвар ва бо ҷалби хизматчиёни ҳарбии сатҳу зинаҳои гуногуни Дастгоҳи марказиву Ситоди генералии Қувваҳои Мусаллаҳи мамлакат дар ҳудуди пойгоҳи Қувваҳои ҳарбӣ-ҳавоӣ ва мудофиаи зиддиҳавоӣ ҳашари дастаҷамъонаи ниҳолшинонӣ доир карда шуд.
Иштирокчиёни ҳашари дастаҷамъона, бо маслиҳату машварати мутахассисону масъулини хоҷагиҳои ёрирасон ва бо риояи қоидаҳои агросаноатӣ дар ҳудуди заминҳои обии
хоҷагии ёрирасони назди Қувваҳои ҳарбӣ-ҳавоӣ ва мудофиаи зиддиҳавоӣ дар масоҳати ҳазор метри мураббаъ боғи олу бунёд намуданд.
Қобили зикр аст, ки тайи панҷ соли охир, дар ҳудуди пойгоҳи ин навъи қӯшун, ё худ Қувваҳои ҳарбӣ-ҳавоӣ бо ҳашари дастаҷамъонаи ниҳолшинонӣ дар ҳудуди 16 гектар замин, боғи 30-солагии Истиқлолият ва 25-солагии Артиши миллӣ бунёд карда шуда, дар онҳо асосан дарахтони ороишӣ ва навъҳои гуногуни ниҳолҳои мевадиҳанда, аз қабили, зардолу, себ, гелос ва ғайра шинонида шуданд.
Тибқи иттилои полковник Дилшод Аминзода-сардори Шуъбаи кишоварзии Раёсати ақибгоҳии Вазорати мудофиа, бунёди боғҳои мазкур аллакай самараи дилхоҳ ба бор оварда, қисмҳои низомии баландкӯҳи кишвар дар мавсими ҷамъоварии ҳосил бо 
меваҳои тару тоза ва дар фасли сармо бошад, бо меваи хушк давоми сол таъмин карда мешаванд. Илова бар ин, аз ҳисоби меваҳои лазизи ҷамъовардашуда, барои сарбозон афшурдаи мураббо, шарбат ва дигар маҳсулоти истеъмолӣ истеҳсол мегардад.
Ташкилкунандгон ва иштирокчиёни ҳашари дастаҷамъона, ҳамчун меросбарон ва ҳимоятгарони тамомияти арзӣ ва фарҳангу тамаддуни миллӣ ин гуна корҳои созандагиву бунёдкориро дар ҳоле анҷом медиҳанд, ки имрӯзҳо мардуми ориёинажод, пеш аз ҳама, ҷомеаи Тоҷикистон бо ёдоварӣ аз арзишҳову унсурҳои аҷдодӣ ҷашни садаро, ки ба қавли фарҳангшиносон ҷашни Наврӯз давоми мантиқии он аст, таҷлил менамоянд.
Фаридун МАҲМАДАЛИЗОДА,
сардори Маркази матбуот,
полковник
